Առաջիկայում ոչ պոպուլյար խնդիր ենք լուծելու, բայց, այո՛, կրճատումներ լինելու են․ ՀՀ վարչապետ․ ՏԵՍԱՆՅՈՒԹ

Կառավարությունը մարտի 7-ի նիստում հավանություն տվեց «Կառավարության կառուցվածքի և  գործունեության մասին» ՀՀ օրենքում փոփոխություններ և  լրացումներ կատարելու մասին» և կից նախագծերի փաթեթին։

 «Կառավարության կառուցվածքի և գործունեության մասին» ՀՀ օրենքի նախագծով  Կառավարությունը կազմված է  լինելու վարչապետից, երկու փոխվարչապետներից և նախարարներից:

Կառավարության կառուցվածքում ընդգրկվում են հետևյալ նախարարությունները.

1) աշխատանքի և սոցիալական հարցերի նախարարությունը,

2) առողջապահության նախարարությունը,

3) արդարադատության նախարարությունը,

4) արտակարգ իրավիճակների նախարարությունը,

5) արտաքին գործերի նախարարությունը,

6) կրթության, գիտության, մշակույթի և սպորտի նախարարությունը,

7) շրջակա միջավայրի նախարարությունը,

8) պաշտպանության նախարարությունը,

9) տարածքային կառավարման և ենթակառուցվածքների նախարարությունը,

10) բարձր տեխնոլոգիաների արդյունաբերության նախարարությունը,

11) Էկոնոմիկայի նախարարությունը,

12) ֆինանսների նախարարությունը:

Նախագծի վերաբերյալ վարչապետ Նիկոլ Փաշինյանը նկատեց, որ առաջարկվող փոփոխություններով իրենք փորձում են լուծել իրենց հիմնական խնդիրը՝ պետական կառավարման արդյունավետության բարձրացումը։

«Մենք գնալու ենք հանդարտ ճանապարհով, կադրային ջարդ չենք անելու, նախարարություններն իրենց հաստիքներով կոնսոլիդացվելու են։ Այո՛,  կրճատումներ լինելու են, բայց յուրաքանչյուր պետական ծառայող իր շանսն է ստանալու։  Մենք պետք է լինենք մաքսիմալ շրջահայաց, որ պետական կառավարման ապարատի արդյունավետության բարձրացմանը հասնենք՝ որպես նպատակ, և այս քայլը դրան հասնելու միջանկյալ տարբերակ է, որով յուրաքանչուր պետաշխատակցի առաջ դրվում է շատ կոնկրետ խնդիր՝  վերանայել սեփական աշխատանքի որակը։ Մենք առաջիկայում ոչ պոպուլյար խնդիր պետք է լուծենք, որ պետական կառավարման համակարգում պետք է աշխատեն բարձր որակավորում ունեցող աշխատակիցներ, սրանից բխող հետևանքներով»,- նշեց վարչապետը։

Նշենք, որ  օրենքի նախագիծը կքննարկվի ԱԺ ոչ թե արտահերթ, այլ հերթական նստաշրջանի ընթացքում։

Մանրամասները՝ տեսանյութում։

Աղավնի Սուքիասյան