29.03.2026 | 22:16
Հրդեհ ավտոմեքենայում․ տուժածներ չկան
Զոհրաբ Մնացականյանը ներկայացրեց այն չափորոշիչները, որոնք անհրաժեշտ են դեսպանների գործուղման համար. ՏԵՍԱՆՅՈՒԹ
Քաղաքականություն
06.03.2019 | 18:53
Մենք չենք մերժում այն, ինչ կառուցվել է տարիներ շարունակ, մեր հիմնական նպատակն է՝ ավելի ամրապնդել դիվանագիտական ծառայությունը, ավելի ուժեղացնել այն հիմքերը, որոնք պրոֆեսիոնալացնում են ծառայությունը: Մարտի 6-ին ՀՀ Ազգային ժողովում Կառավարության հետ հարցուպատասխանի ժամանակ ասաց ԱԳ նախարար Զոհրաբ Մնացականյանը՝ պատասխանելով դեսպանների գործուղման համար սահմանված չափանիշների և դրանց փոփոխության մասին «Իմ քայլը» խմբակցության պատգամավոր Սոնա Ղազարյանի հարցին: Նրա խոսքով՝ դիվանագիտական ծառայության մասին օրենքը սահմանում է, թե ինչպես է երիտասարդը ներգրավվում ծառայության մեջ, ինչ չափորոշիչներ կան, ինչ քննություն պետք է հանձնել:
«Այս շրջանում մենք արդեն ի հայտ բերեցինք, այսպես ասեմ, նոր սերնդի դեսպանների՝ մեր այն աշխատողներին, որոնք իրենց աշխատանքով, տարիներ շարունակ կուտակած փորձով եկան այն սահմանին հասան, երբ կարող են դեսպանի կարգավիճակով իրականացնել իրենց ծառայությունը»,- ասաց նախարարը:
Զոհրաբ Մնացականյանը նաև նշեց, որ այսօր դեսպանների ռոտացիոն սկզբունքը շատ ավելի խիստ է իրականացվում. «Ռոտացիան ոչ միայն տարիների առումով, այլ նաև տարածաշրջանների առումով: Մենք փորձում ենք ընդլայնել պրոֆեսիոնալ կարողությունները: Եթե մեկն աշխատում է եվրոպական ուղղությամբ, մյուսը՝ այլ ուղղությամբ, չի նշանակում, որ ամբողջ կարիերան պետք է այդ ուղղությամբ շարունակի: Մենք փորձում ենք նաև տարբեր տարածաշրջաններ գործուղել մարդկանց»:
Մանրամասները՝ տեսանյութում:
Աղավնի Սուքիասյան
