11.03.2026 | 23:28
Իրանի սպորտի նախարարը հայտարարել է, որ երկիրը չի մասնակցի ֆուտբոլի աշխարհի առաջնությանը
Իսրայելի կողմից Ադրբեջանին զենք վաճառելը միայն թեժացնում է սպառազինության մրցավազքը. ԱԳ փոխնախարարի հարցազրույցը Jerusalem Post-ին
Քաղաքականություն
06.03.2019 | 17:20
Հայաստանը կողջունի, եթե Իսրայելը, ԱՄՆ-ի ու եվրոպական երկրներից շատերի նման, զենք չվաճառի ո՛չ Ադրբեջանին, ո՛չ Հայաստանին: The Jerusalem Post-ին տված հարցազրույցում այս մասին ասել է ՀՀ ԱԳ փոխնախարար Գրիգոր Հովհաննիսյանը:
Պաշտոնյան նշել է, որ ղարաբաղյան հակամարտությունը ռազմական լուծում չունի, այլ միայն քաղաքական, իսկ Ադրբեջանին զենք վաճառելը միայն թեժացնում է սպառազինության մրցավազքը:
«Ադրբեջանին զենք վաճառելը սովորական գործնական հարաբերություններից վեր է և կարող է հետևանքներ ունենալ: Մենք հարուստ երկիր չենք, և ամեն անգամ, երբ Ադրբեջանն Իսրայելից զենք է ստանում, հակադարձելու համար մենք ստիպված ենք լինում երկրի ՀՆԱ-ից զգալի ծախսեր կատարել»,- ասել է Գրիգոր Հովհաննիսյանը։
ՀՀ փոխարտգործնախարարը չի բացառել առաջիկայում Իսրայելի հետ պաշտպանության ոլորտում համագործակցությունը։
Գրիգոր Հովհաննիսյանն ասել է նաև, որ Հայաստանը Իսրայելի կողմից կողջունի Հայոց ցեղասպանության ճանաչումը, սակայն դրանով չէ պայմանավորված հայ-իսրայելական հարաբերությունների խորացումը. «Հայաստանը կողջունի Իսրայելի կողմից պատմական այդ իրողության ճանաչումը: Այդուհանդերձ, դա ավելի սերտ հարաբերություններ զարգացնելու նախապայման չէ»:
Նա նշել է, որ թեև որպես ցեղասպանությունը վերապրածների ժառանգ՝ անձամբ հիասթափված է այն բանից, որ Իսրայելը մինչ օրս չի ճանաչել Հայոց Ցեղասպանությունը, այնուամենայնիվ, Հայաստանի ԱԳ նախարարության դիրքորոշումն այլ է:
Գրիգոր Հովհաննիսյանը նաև անդրադարձել է Իսրայելում դեսպանատուն բացելու՝ Հայաստանի մտադրությանը՝ համոզմունք հայտնելով, որ դա արվում է երկու երկրների հարաբերությունները նոր մակարդակի հասցնելու համար: Դեսպանատունը, սակայն, Երուսաղեմում չի լինի:
«Հայաստանի նման փոքր երկրի համար շատ դժվար է ավանդական դիրքորոշումներից փոքրիկ շեղումներ անել՝ առանց լայն արձագանք հրահրելու: Դեսպանատան վայրի հետ կապված Հայաստանի մոտեցման մեջ ոչինչ չի փոխվել, բայց ես հիմնովին չեմ ուզում այդ հարցի վրա կենտրոնանալ: Կարևորը կապերի ամրապնդումն է»,- ընդգծել է Գրիգոր Հովհաննիսյանը՝ հավելելով, որ Իսրայելում Հայաստանի դեսպանատուն բացելը պատասխան քայլ ակնկալելու համար նախադրյալ չէ:
Նելլի Մելքոնյան
