03.09.2026 | 23:17
Հայտնի են Ֆրանսիայի դեսպանատան ընդունելությունից հետո գրանցված թունավորման հնարավոր պատճառները
Ամեն ինչ նորմալ, իր հունով ընթանում է. Վահան Շիրխանյանը՝ Սպաների համահայկական միության ծրագրերի մասին
Քաղաքականություն
06.03.2019 | 16:00
Մամուլն այսօր գրել էր, որ պաշտպանության նախկին փոխնախարար Վահան Շիրխանյանի կողմից նախաձեռնված Սպաների համահայկական միություն ստեղծելու նախաձեռնությունն այդպես էլ կմնա չիրականացած:
Ըստ հրապարակման՝ պաշտպանության նախարար Դավիթ Տոնոյանն անտարբեր է դարձել նախաձեռնության նկատմամբ, ինչպես նաև սփյուռքում գտնվող հայ պաշտոնաթող սպաների մոտ «առկա ոգևորությունը սառել է»:
Factor.am-ի հետ զրույցում, սակայն, Վահան Շիրխանյանը պնդեց հակառակը. «Մարդիկ կա՛մ միտումնավոր ուզում են չարություն արած լինել, կա՛մ բանուգործ չունեն՝ ընկել են բամբասանքների հետևից: Ամեն ինչ նորմալ, իր հունով ընթանում է»։
Վահան Շիրխանյանն ասաց, որ պատրաստվում են մեկ ամսվա ընթացքում մեծ համագումար հրավիրել, որին կմասնակցի նաև պաշտպանության նախարար Դավիթ Տոնոյանը: Համագումարին կհրավիրեն նաև լրատվամիջոցներին:
Հիշեցնենք, որ ավելի վաղ Վահան Շիրխանյանը հայտարարել էր, թե իր նախաձեռնությամբ ստեղծվելու է «Սպաների համահայկական միություն», որի անդամները լինելու են թոշակի անցած սպաները: Ըստ Շիրխանյանի՝ Հայաստանում նման սպաների թիվը գերազանցում է 20.000-ը: Սպաներն իրենց առաջարկություններով և խորհուրդներով օգնելու և համագործակցելու են ՊՆ-ի հետ։
Լիլիթ Շաբոյան
