Արա Մինասյանն ընդդեմ Արսեն Թորոսյանի գործով նիստը հետաձգվեց. Թորոսյանի ներկայացուցիչը բացարկ ներկայացրեց դատավորին

«Սուրբ Գրիգոր Լուսավորիչ» բժշկական կենտրոնի նախկին տնօրեն Արա Մինասյանն ընդդեմ ՀՀ առողջապահության նախարար Արսեն Թորոսյանի քաղաքացիական գործով այսօրվա դատական նիստին նախարարի ներկայացուցիչ Գևորգ Գյոզալյանը բացարկի միջնորդություն ներկայացրեց նախագահող դատավոր Սարգիս Երիցյանին: Գյոզալյանն իր միջնորդության մեջ նշեց. «Դուք ձեր վարքագծով շահագրգռված եք հօգուտ հայցվորի»։

Հայցվոր կողմն առարկեց միջնորդության դեմ: Դատական նիստը հետաձգվեց, դատարանը հեռացավ խորհրդակցական սենյակ՝ որոշում կայացնելու: Այն կհրապարակվի մարտի 11-ին ժամը 09։30։

Հիշեցնենք, որ Արա Մինասյանը «Սուրբ Գրիգոր Լուսավորիչ» բժշկական կենտրոնում կատարված չարաշահումների առթիվ հարուցված քրեական գործով ունի մեղադրյալի կարգավիճակ: Նա հետախուզվում է:

Մինասյանը զրպարտության և վիրավորանքի համար քաղհայցով դիմել է դատարան՝ հերքոմ պահանջելով առողջապահության նախարար Արսեն Թորոսյանի ֆեյսբուքյան ուղիղ եթերով արված հետևյալ արտահայտությունների համար.

– Մեր ստուգումները ցույց տվեցին, որ այդ չարաշահումներն այնքան սիստեմատիկ են, որ նույնիսկ ստուգումների ընթացքում չեն դադարում։ Այսինքն՝ մենք մինչև հիմա ստանում ենք հաշվետվություններ նույն մարդու համար մի քանի անգամ պետական գումար գանձելու։

– Չի դադարում էդ թալանը և, այսպես ասած, վատնումը։ Իսկ ի՞նչ է տեղի ունեցել, հիմնական բաժինը՝ 400 մլն-ից ավելին, հիմա ասեմ կոնկրետ թիվը՝ 400 քանի միլիոն: Մարդիկ եկել են, հանձնել են արյան անալիզ և մի քանի այլ փոքր հետազոտություններ են արել, վերջում պարզվել է, որ այդ մարդիկ պառկել են հիվանդանոցում ու 200 հազար դրամի բուժում են ստացել:

– 8.000 դրամի փոխարեն բուժհիմնարկը գանձում է 200.000 դրամ պետական բյուջեից և տարիներ շարունա՞կ:

– Ավելին ասեմ, հետո էդ գումարներով կատարվել են շատ հետաքրքիր գնումներ, միշտ նույն մարդկանցից: Տարատեսակ պատճառներով իսկական հաղթողները մերժումներ են ստացել ինչ-որ թղթերի հիման վրա, որ որակին չի համապատասխանում, ու էդ գումարները տրվել են կոնկրետ մարդկանց՝ հիմնականում միշտ նույն մարդկանց։

– Տարիներ շարունակ բժիշկներն աշխատավարձ չեն ստացել նորմալ:

– Նորից կրկնում եմ՝ 8.000 դրամ հետազոտության փոխարեն պետությունից 400 մլն-ից ավել գանձվել է՝ ամեն մեկի համար 150-200 հազար դրամ, ձևակերպվել են հիվանդության պատմություններ:

– 99 %-ով վստահ եմ՝ այստեղ կան քրեական տարրեր, որովհետև էդ գումարները փաստացի շորթվել են պետությունից:

Արա Մինասյանը գտնում է, որ այս արտահայտություններն ուղղված են իրեն և պահանջում է հերքում, մինչդեռ Արսեն Թորոսյանի պաշտպանական կողմը պնդում է, որ նախարարն ընդհանուր չարաշահումների մասին է խոսել և ոչ թե կոնկրետ անձի:

Լիլիթ Շաբոյան