Մամեդյարովն ու ԵԱՀԿ նախագահն անդրադարձել են Արթուր Վանեցյանի հայտարարությանը

Ադրբեջանի ԱԳ նախարար Էլմար Մամեդյարովը և ԵԱՀԿ գործող նախագահ, Սլովակիայի արտգործնախարար Միրոսլավ Լայչակը Բաքվում հանդիպում են ունեցել։ Մամուլի ասուլիսի ընթացքում Մամեդյարովը հայտարարել է, որ Ադրբեջանն ու ԵԱՀԿ-ն կարևոր հարցեր են քննարկել, այդ թվում՝ Ղարաբաղյան հակամարտության կարգավորման վերաբերյալ։ Նրա խոսքով՝ բոլորն ուզում են, որ Ղարաբաղյան հակամարտությունը խաղաղ ճանապարհով լուծվի։ Այս մասին հայտնում է moscow-baku.ru կայքը։

«Մենք մշտապես քննարկումներ ենք վարում՝ հակամարտության կարգավորման եղանակներ գտնելու համար»,- նշել է Մամեդյարովը։

Նա հիշեցրել է, որ Ադրբեջանի նախագահ Իլհամ Ալիևը Հայաստանի վարչապետ Նիկոլ Փաշինյանի հետ մի քանի հանդիպում է ունեցել։ Բացի այդ՝ ևս չորս հանդիպում է տեղի ունեցել նախարարների մակարդակով։

Ադրբեջանի արտգործնախարարն ընդգծել է, որ ԵԱՀԿ Մինսկի խմբի համանախագահները մի քանի անգամ հայտարարել են հակամարտության շուրջ ստատուս քվոյի անթույլատրելիության մասին։ Նա, միաժամանակ, նշել է, որ ԵԱՀԿ նախագահի հետ քննարկել է Ղարաբաղյան հակամարտության վերաբերյալ Հայաստանի ղեկավարության վերջին հայտարարությունները: Որպես օրինակ նա նշել է ՀՀ ԱԱԾ տնօրենի վերջին հայտարարությունը՝ ասելով, որ այն ուղղված չէ խաղաղությանը:

Հիշեցնենք, որ Արցախ կատարած այցի ընթացքում ՀՀ ԱԱԾ տնօրեն Արթուր Վանեցյանը հայտարարել էր, որ մեր հողերում պետք է բնակվեն մեր հայրենակիցները. «Մենք ոչ մի թիզ հող հանձնելու նպատակ չունենք, ընդհակառակը, մեր հողերում պետք է բնակվեն մեր հայրենակիցները և շենացնեն մեր երկիրը»:

Մամեդյարովը ԵԱՀԿ գործող նախագահ Միրոսլավ Լայչակին խնդրել է հաջորդ շաբաթ Երևան այցի ընթացքում  Հայաստանի իշխանությանը հարցնել, թե «մենք մեր ժողովուրդներին նախապատրաստելու ենք խաղաղությա՞ն, թե՞ այլ ուղղությամբ»:

Նելլի Մելքոնյան