Պետական այրերը հարգանքի տուրք մատուցեցին Սպարապետ Վազգեն Սարգսյանի հիշատակին. ՏԵՍԱՆՅՈՒԹ

Այսօր ՀՀ մի շարք բարձրաստիճան այրեր Եռաբլուր զինվորական պանթեոնում հարգանքի տուրք մատուցեցին ՀՀ պաշտպանության նախկին նախարար, նախկին վարչապետ, ազգային հերոս Վազգեն Սարգսյանի հիշատակին։ Այսօր նրա ծննդյան օրն էր, Սպարապետը կդառնար 60 տարեկան։ 1999 թվականի հոկտեմբերի 27-ին ՀՀ վարչապետ Վազգեն Սարգսյանը, ԱԺ նախագահ Կարեն Դեմիրճյանը, ԱԺ փոխնախագահներ՝ Յուրի Բախշյանը, Ռուբեն Միրզոյանը, պատգամավորներ՝ Արմենակ Արմենակյանը, Հենրիկ Աբրահամյանը, Միքայել Քոթանյանը և ՀՀ օպերատիվ հարցերով նախարար Լեոնարդ Պետրոսյանը խորհրդարանի շենք մուտք գործած մի խումբ զինված անձանց կողմից սպանվեցին:

Գլխավոր մեղավորները, ի դեմս Նաիրի Հունանյանի, դատապարտվեցին ցմահ ազատազրկման: Սակայն կազմակերպիչների վերաբերյալ տարբեր վարկածներ առաջ քաշվեցին, որոնք մինչ օրս էլ շրջանառվում են։

Նշենք, որ Վազգեն Սարգսյանի եղբայր Արամ Սարգսյանը ներկա չէր Եռաբլուրում ընթացող միջոցառմանը։ Նա Բակո Սահակյանի հրավերով գտնվում էր Արցախում, որտեղ ևս հիշատակի արարողություն էր ընթանում, որին ներկա էր նաև երրորդ նախագահ Սերժ Սարգսյանը։

Արամ Սարգսյանը, անդրադառնալով Հոկտեմբերի 27-ի բացահայտմանը, ասել էր, որ դա տեղի կունենա այն ժամանակ, երբ Հայաստանը կհզորանա։ Սպարապետի մյուս եղբայրը՝ Արմեն Սարգսյանը, այսօր Եռաբլուր պանթեոնում լրագրողների հետ զրույցում ասաց, որ կարծում է Մարտի 1-ի դեպքերի բացահայտումը ավարտին հասցնելուց հետո, իշխանությունները ձեռնամուխ կլինեն նաև Հոկտեմբերի 27-ի բացահայտմանը։

Հիշեցնենք, որ Հայաստանի Ազգային հերոս, Արցախի հերոս Վազգեն Սարգսյանի ծննդյան 60-ամյակը հանդիսավորությամբ նշելու նպատակով ՀՀ կառավարության պահուստային ֆոնդից Պաշտպանության նախարարությանը հատկացվել էր 12 մլն 887 հազար դրամ։

Մանրամասները՝ տեսանյութում։

Լիլիթ Շաբոյան