18.01.2026 | 11:31
Վթարային ջրանջատում Վայոց Ձորի մարզում
Բանակը, որը 100% քվեարկում էր ՀՀԿ-ի օգտին, հիմա քվեարկում է ներկա իշխանության օգտին. Սերգեյ Բագրատյան. ՏԵՍԱՆՅՈՒԹ
Քաղաքականություն
05.03.2019 | 16:32
Ազգային ժողովի այսօրվա նիստում քննարկվում էր «2018 թվականի դեկտեմբերի 9-ին Հայաստանի Հանրապետության Ազգային ժողովի արտահերթ խորհրդարանական ընտրությունների մասին» ԿԸՀ գործունեության հաշվետվությունը։
Ըստ ԿԸՀ նախագահ Տիգրան Մուկուչյանի՝ Կենտրոնական ընտրական հանձնաժողովը խորհրդարանական արտահերթ ընտրությունների նախապատրաստման միջոցառումներն իրականացրել է սեղմ ժամկետում, 12 օրվա ընթացքում ընտրական գործընթացի ավելի քան 16.000 կազմակերպիչ էլ վերապատրաստում է անցել, իսկ քվեարկությունից առաջ և հետո միջազգային ու տեղական բոլոր դիտորդները լիարժեք մշտադիտարկել են գործընթացը։
«Այն կազմակերպված էր բաց, ներկա էին դիտորդներ և տարբեր կուսակցությունների ներկայացուցիչներ»,- ասաց ԿԸՀ նախագահը։
ԱԺ ԲՀԿ խմբակցության պատգամավոր Սերգեյ Բագրատյանը նշեց, որ 2018-ի արտահերթ խորհրդարանական ընտրությունների ժամանակ վարչական ռեսուրսի կիրառում չնկատվեց, բայց դրա ազդեցությունը խիստ նկատելի էր։
«Կա պասիվ և ակտիվ ներգործության մեթոդ։ Եթե նախկին իշխանությունների ժամանակ կիրառվում էր ակտիվ ներգործության մեթոդը, այս անգամ կիրառվեց պասիվ մեթոդը։ Եթե մարզպետը կամ ոլորտի նախարարը մասնակցում են ընտրություններին, և մենք դեռ չունենք այնպիսի բարձր իրավագիտակցություն, ուստի մարդիկ չէին կարող այդ պաշտոնյաներից չունենալ կախվածություն։ Ցավոք, ես ինքս տարբեր տեղամասերում արձանագրել եմ, որ բանակը, որը 100 տոկոսով քվեարկում էր Հանրապետական կուսակցությանը, հիմա քվեարկում է ներկա իշխանությանը և մտահոգություն կա հաջորդ անգամ էլ քվեարկելու հաջորդ իշխանությանը։ Կամ ոստիկանությունը, չգիտես ինչ հրամանով, որոշել էր, որ պետք է քվեարկի ներկա իշխանությանը, իսկ նախկինում քվեարկում էր նախորդներին։ Հիմա մենք կարողանալո՞ւ ենք ստանալ այնպիսի իրավիճակ, որ այդ կառույցները չունենան ազդեցություն»,- ասաց Բագրատյանը։
Ի պատասխան՝ ԿԸՀ նախագահը նշեց, որ նախընտրական քարոզչության ժամանակ գործել են սահմանափակումներ թեկնածուների համար, սակայն չկա այնպիսի կանոնակարգում, որն արգելի պաշտոնատար անձին մասնակցել ընտրություններին։
«Ինչ վերաբերում է այս կամ այն մարմնի կողմից հրահանգավորված քվեարկություն իրականացնելուն, ապա ես ձեռնպահ կմնամ, որովհետև ԿԸՀ-ին որևէ փաստ հայտնի չէ: Այսպիսի փաստարկված ինչ-որ մոտեցումներ, որ այս կամ այն մարմինը հրահանգավորված քվեարկել է այս կամ այն կերպ, չի եղել։ Որևէ փաստ առկա չէ»,- ասաց Մուկուչյանը։
Աղավնի Սուքիասյան
