Հերթական անգամ քաղաքական դաշտն ապականելու քայլ է. Գորգիսյանը՝ վարչապետի հայտարարության մասին. ՏԵՍԱՆՅՈՒԹ

Համապատասխան հանձնաժողովում, կարծում եմ, արժի այդ հարցը բարձրացնել: Լրագրողների հետ զրույցում այս մասին ասաց ԱԺ ԼՀԿ խմբակցության պատգամավոր, պաշտպանության և անվտանգության հարցերի մշտական հանձնաժողովի անդամ Գևորգ Գորգիսյանը՝ անդրադառնալով հարցին, թե ինչո՞ւ ՊՆ-ն և ՊԲ-ն չեն հայտնել Արցախի պաշտպանության բանակում զոհված զինծառայողների մասին:

«Քաղաքացիական հասարակության միջամտության արդյունքում մենք հասել էինք նրան, որ բանակում շատ թափանցիկ պրոցեսներ էին գնում։ Հիմա եթե կա նման դեպքերի, փաստերի կոծկում կամ չհրապարակում, դա հետընթաց է ունեցած իրավիճակից»,- ասաց նա:

Հիշեցնենք, որ ՀՀ գլխավոր դատախազությունը, ի պատասխան լրատվամիջոցներից մեկի հարցման, հայտնել էր, որ հունվարի 1-ից փետրվարի 20-ը ԶՈւ-ում ու ՊԲ-ում զինծառայության հետ կապված 3 մահվան դեպք է գրանցվել, 4 մահվան դեպք էլ եղել է ծառայության հետ չկապված հանգամանքներում:

Գորգիսյանն ընդգծեց, որ ինքն ԱԺ պաշտպանության և անվտանգության հարցերի հանձնաժողովի նախագահին առաջարկելու է հրավիրել պաշտպանության նախարարին և հարցուպատասխան կազմակերպել հանձնաժողովի անդամների հետ, որպեսզի այդ դեպքերն ուսումնասիրվեն և պաշտպանության ոլորտում թափանցիկությունն ապահովվի:

Մեր հարցին՝ արդյո՞ք միտում տեսնում է, որ իշխանությունները միտումնավոր են թաքցնում բանակում մահվան դեպքերը, Գորգիսյանն արձագանքեց. «Չեմ կարող հիմա այդ հարցին պատասխանել, որովհետև չեմ լսել իշխանություն պարզաբանումները»:

Անդրադառնալով վարչապետի հայտարարությանը, թե Հայաստանում կան քաղաքական գործիչներ, որոնք օտարերկրյա գործակաների են նման, Գևորգ Գորգիսյանն ասաց. «Եթե վարչապետն ունի տվյալներ, պետք է համապատասխան մարմիներին փոխանցի: Եթե ոչ, ապա դա հերթական անգամ քաղաքական դաշտն ապականելու քայլ է»:

Մանրամասները՝ տեսանյութում:

Նարեկ Կիրակոսյան