30.06.2026 | 23:28
«Ուիմբլդոն»․ Կարեն Խաչանովը մեկնարկել է հաղթանակով
27 տարին լրացած և չծառայած քաղաքացիները հայրենիք կարող են վերադառնալ և չհետապնդվել՝ օրենքով սահմանված գումարը վճարելու դեպքում
Քաղաքականություն
05.03.2019 | 13:21
Ազգային ժողովի «Լուսավոր Հայաստան» խմբակցությունը ներկայացրել է օրենսդրական նախաձեռնություն սահմանադրական կարգի խախտմամբ պարտադիր զինվորական ծառայություն չանցած քաղաքացիների մասին ՀՀ օրենքում փոփոխություններ կատարելու մասին։
Այս նախագծով առաջարկվում է 27 տարին լրացած և բանակում չծառայած Հայաստանից դուրս գտնվող քաղաքացիներին վերադառնալ հայրենիք, ազատվել հետապնդումից՝ դրա դիմաց վճարելով համապատասխան գումարը։
«Նախագիծը միտված է հնարավորություն տալ այն քաղաքացիներին, որոնց 27 տարին լրացել է, և նրանք այլևս զինապարտ չեն, վերադառնալ հայրենիք, ազատվելով քրեական հետապնդումից` վճարել օրենքով սահմանված գումարը: Ամեն բաց թողնված զորակոչի համար պետք է վճարեն նվազագույն աշխատավարձի 200-պատիկի չափով: Նախկին կարգավորմամբ այս ժամանակահատվածը սահմանված էր մինչ 2017-ի դեկտեմբերի 1-ը 27 տարին լրացած քաղաքացիների համար: Նախագծով առաջարկվում է այդ ժամկետը երկարաձգել մինչ 2019-ի մարտի 1-ը»,-նախագծի քննարկման ժամանակ ասաց ԼՀԿ-ական պատգամավոր Գևորգ Գորգիսյանը:
«Իմ քայլը» խմբակցության պատգամավոր Արմեն Խաչատրյանը նախագծի վերաբերյալ նկատեց, որ թեև նախագիծը ժամանակավոր է լուծում խնդիրը, բայց այն հրատապ է և նպատակահարմար։
Որոշումն առաջին ընթերցմամբ ընդունվեց ձայների 96 կողմ, 0 դեմ, 0 ձեռնպահ հաշվարկով։
Աղավնի Սուքիասյան
