Պարո՛ն Պետրոսյան, Ձեզ կոռեկտության կոչ եմ անում, որ ստիպված չլինենք կոռեկտության սեմինարներ անցկացնել․ Արեն Մկրտչանը՝ ԲՀԿ-ական պատգամավորին

Ազգային ժողովի մարտի 5-ի նիստի օրակարգում չընդգրվեց «Բարգավաճ Հայաստան» խմբակցության պատգամավորների ներկայացրած օրենսդրական նախաձեռնությունը, որը վերաբերում էր «Արհմիությունների մասին» օրենքում փոփոխություններ և լրացումներ կատարելուն։

ԲՀԿ-ական պատգամավոր Գևորգ Պետրոսյանն իր ելույթում նշեց, որ առաջարկվող փոփոխությունների արդյունքում մենք ունենալու ենք անկախ ահեստակցական միություններ, ուստի չի հասկանում՝ ինչու է իշխանությունը բացասական եզրակացություն տվել այդ օրենսդրական նախաձեռնությանը։

Անդրադառնալով  ԲՀԿ-ական պատգամավոր Գևորգ Պետրոսյանի հարցադրմանը՝ ԱԺ «Իմ քայլը» խմբակցության պատգամավոր Արեն Մկրտչյանը  նշեց, որ հանձնաժողովի նիստում խորհրդականները ուսումնասիրել են ներկայացված նախագիծը, որից հետո իրենք տեղեկացրել են, որ եթե այս նախագծին տրվի դրական եզրակացություն, ապա մենք այս ոլորտում ունենալու ենք հետևյալ իրավիճակը․ «Հնարավորություն է ստեղծելու այն  մեկ առանձին գործարարի, որը բիզնես գործունեություն է ծավալում տարբեր ոլորտներում, տոտալ վերահսկողություն սահմանել իր ենթակայության տակ գտնվող բիզնես ոլորտների հանդեպ։ Պարզ ասեմ, օրինակ, խաղատունը, կոնյակի գործարանը, ցեմենտի գործարանը կարող են ստեղծել մեկ արհեստակցական միություն և եթե ինչ-որ հրաշքով պարզվեր, որ այդ երեք ձեռնարկությունները տնօրինում է մեկ սեփականատեր, մենք ռիսկ էինք գեներացնում քաղաքացիներին տոտալ վերահսկողության տակ դնելու արհեստակցական միության միջոցով»։

ԱԺ «Իմ քայլը» խմբակցության պատգամավորը Գևորգ Պետրոսյանին նաև հիշեցրեց ԱԺ պետական-իրավական հարցերի մշտական հանձնաժողովում արված այն հայտարարությունը, թե 88 հոգանոց իշխանական խմբակցությունը օրենքներ է դակում։

«Պարոն Գևորգ Պետրոսյան, ես ձեզ կոռեկտության կոչ եմ անում, հակառակ պարագայում մենք ստիպված կլինենք կոռեկտության սեմինարներ անցկացնել ու գրավոր և բանավոր քննություն ընդունել ձեզանից»,- ԲՀԿ-ական գործընկերոջն ասաց Մկրտչյանը։

Աղավնի Սուքիասյան