11.03.2026 | 23:28
Իրանի սպորտի նախարարը հայտարարել է, որ երկիրը չի մասնակցի ֆուտբոլի աշխարհի առաջնությանը
Անընդհատ խոսվում է հանդուրժողականության, սիրո մասին, սա՞ է հանդուրժողականության մթնոլորտը․ Գևորգ Պետրոսյան
Քաղաքականություն
05.03.2019 | 12:46
Ազգային ժողովի մարտի 5-ի նիստի օրակարգում ընդգրկված չէր «Բարգավաճ Հայաստան» խմբակցության ներկայացրած օրենսդրական նախաձեռնությունը, որը վերաբերում էր «Արհեստակցական միությունների մասին» օրենքում փոփոխություններ և լրացումներ կատարելու նախագծին, ինչը, ի դեպ, Կառավարությունում ստացել է բացասական եզրակացություն։
ԲՀԿ-ական պատգամավոր Գևորգ Պետրոսյանն իր ելույթում նշեց, որ այս նախագծի նպատակն այն է, որ ՀՀ-ում ունենանք անկախ արհեստակցական միությունները, ինչը հետաքրքրում է հարյուր հազարավոր աշխատող քաղաքացիների։
«Ի՞նչն է պատճառը, որ Ազգային ժողովը չի ցանկանում ունենալ անկախ արհեստակցական միություն»,- հարցադրում հնչեցրեց պատգամավորը։
Անդրադառնալով ԱԺ «Իմ քայլը» խմբակցության պատգամավոր Արեն Մկրտչյանի՝ այս նախագծի վերաբերյալ արված դիտարկմանը, Գևորգ Պետորսյանն ասաց․ «Հանձնաժողովի նիստին գալ ուշացումով, չլսել իմ զեկույցը, որևէ բառ չարտասանել նախագծի վերաբերյալ ու դուրս գալ հարցազրույց տալ ու ասել, թե այս նախագծի իմաստը աշխատողներին տոտալ վերահսկողության տակ պահելն է… Ես ուսումնասիրել եմ 26-ամյա Արեն Մկրտչյանի կենսագրությունը․ նա 26 տարեկան է, իսկ ես 23 տարի աշխատել և զբաղվել եմ աշխատողների իրավունքների դատական պաշտպանությամբ։ Այդ ո՞նց եղավ, որ ես վեր կացա ու աշխատողների շահերը տոտալ հսկողության տակ դնող նախագիծ հեղինակեցի։ Անընդհատ խոսվում է հանդուրժողականության, սիրո մասին, բայց սա՞ է հանդուրժողականության մթնոլորտը», – ասաց Գևորգ Պետրոսյանը։
Նշենք, որ ԲՀԿ-ական պատգամավորների ներկայացրած օրենսդրական նախաձեռնությունը ԱԺ նստաշրջանի օրակարգ չընդգրկվեց։
«Իմ քայլը» խմբակցությունը դեմ քվեարկեց նախագծին, իսկ ԲՀԿ-ի և ԼՀԿ-ի կողմ ձայներն ընդամենը 36-ն են։
Աղավնի Սուքիասյան
