10.06.2026 | 13:12
«Ուժեղ Հայաստանի» պատգամավորի թեկնածու Գոհար Մելոյանի ասուլիսը. ՈւՂԻՂ
Նաիրա Զոհրաբյանը կոչ է անում քաղաքական մեծամասնությանը նախորդների սխալները չկրկնել
Քաղաքականություն
05.03.2019 | 11:47
Ազգային ժողովի մարտի 5-ին մեկնարկած նիստում ԱԺ ԼՀԿ խմբակցությունն առաջարկեց օրակարգում ընդգրկել Քրեական օրենսգրքում փոփոխություն կատարելու մասին իր ներկայացրած նախագիծը, որով նախատեսվում է նախնական կալանքի պահման 1 օրը հաշվարկել 1․5 օր։
ԼՀԿ-ական պատգամավորների ներկայացրած օրենքի նախագծին բացասական եզրակացություն է տվել ԱԺ Գլխադասային հանձաժողովը։
Ի դեպ նշենք, որ նախագծին բացասական եզրակացություն էր տվել նաև Կառավարությունը։
ԱԺ ամբիոնից «Բարգավաճ Հայաստան» խմբակցության պատգամավոր Նաիրա Զոհրաբյանը հարց բարձրացրեց, եթե նախորդ իշխանությունների նման այս Ազգային ժողովն էլ պետք է բացասական եզրակացություն տա այն նախագծերին, որոնց նախապես նման եզրակացություն է տվել Կառավարությունը, ապա հարց է առաջանում՝ ի՞նչն է փոխվել։
«Շատ ցավում եմ, որ խորհրդարանը, առաջնորդվելով Կառավարության բացասական եզրակացությամբ, կրկնեց նրանց։ Ի՞նչն էր խանգարում, որ այստեղ մենք քննարկեինք նախագիծը, որից հետո դուք կմնայիք ձեր տեսակետին, մենք՝ մեր։ Եթե այս վատ ավանդույթները, երբ նախկին կառավարությունները ինչ եզրակացություններ տալիս էին, խորհրդարանական մեծամասնությունն էլ էնտուզիազմով դրանք վավերացնում էր՝ շարունակվում են, ապա ես ուզում եմ հասկանալ՝ ի՞նչն է փոխվել մեր քաղաքական մշակույթում»,- ասաց ԲՀԿ-ական պատգամավորը՝ հիշեցնելով, որ արդեն 2-3 նախագիծ, որոնք ներկայացրել է ընդդիմությունը և որոնք Կառավարությունում ստացել են բացասական եզրակացություն, մերժվել են նաև Ազգային ժողովում։
«Մի՛ կրկնեք այն սխալները, որոնք արվել են նախորդ Կառավարության և նախորդ խորհրդարանական մեծամասնության կողմից։ Պարո՛ն Արարատ Միրզոյան, Դուք ինքներդ բազմիցս այս ամբիոնից ասել եք՝ տվեք հնարավորություն նախագծերը քննարկելու»,- նշեց Զոհրաբյանը։
Աղավնի Սուքիասյան
