14.09.2026 | 22:01
Հայաստանի մի շարք հասցեներում էլեկտրաէներգիայի անջատումներ կլինեն
ՊԵԿ-ը յոթ ամիսների ընթացքում «հայտնի կոռուպցիոներներին լավ թափ տալով» 1,8 միլիարդ դրամ է հավաքել. բյուջե մուտքագրվել է 8, 76 միլիարդ դրամ
Տնտեսություն
05.03.2019 | 20:30
2018 թվականի հունիսի 1-ից մինչև դեկտեմբերի 31-ն ընկած ժամանակահատվածում ՊԵԿ-ի գործողությունների արդյունքում պետական բյուջե է փոխանցվել 8 միլիարդ 76 մլն 192 հազար դրամ: Այս մասին Factor.am-ի հարցմանն ի պատասխան տեղեկացնում են ՊԵԿ-ի լրատվության բաժնից:
Գումարի 1 միլիարդ 850 դրամը վերականգնվել է կոռուպցիոն բնույթի հանցագործությունների վերաբերյալ հարուցված քրեական գործերի շրջանակներում, իսկ 4 միլիարդ 530 մլն 469 հազար դրամը ՀՀ պետական բյուջե մուտքագրվել է հարկային պարտավորությունների խախտման դեպքերը բացահայտելու արդյունքում: Այս գումարները վերականգնվել են ՊԵԿ քննչական վարչության կողմից իրականացված քննչական գործողությունների արդյունքում:
ՊԵԿ-ից միաժամանակ հայտնում են, որ ՊԵԿ հետաքննության և օպերատիվ հետախուզության վարչության կողմից վերոնշյալ ժամանակահատվածում կատարվել է 1 միլիարդ 695 մլն 657 հազար ՀՀ դրամի վերականգնում: Այս գումարը ևս մուտքագրվել է պետական բյուջե:
Հիշեցնենք, որ 2018 թվականի հուլիսի 13-ին Հայաստանի վարչապետ Նիկոլ Փաշինյանը, Բրյուսելում անդրադառնալով ԵՄ-ի կողմից 10 միլիոն եվրոյով ՀՀ-ին տրվող դրամաշնորհների ավելացմանը, հայտարարել էր․ «Եթե մեր հայտնի կոռուպցիոներներից մեկին մի լավ թափ տանք, գրպաններից այդքան գումար կթափվի»:
Այսպիսով, ըստ ՊԵԿ-ի, անցած յոթ ամիսների ընթացքում «հայտնի կոռուպցիոներներին լավ թափ տալուց» 1,8 միլիարդ դրամ է թափվել:
Նարեկ Կիրակոսյան
