08.06.2026 | 22:58
Հայտնի է նոր Ազգային ժողովի առաջին նիստի օրը
Վաչագան Ղազարյանը 6 միլիոն դոլարը պետությանը չի փոխանցել
Հասարակություն
04.03.2019 | 17:47
Հայաստանի երրորդ նախագահ Սերժ Սարգսյանի թիկնազորի նախկին պետ Վաչագան Ղազարյանը դեկտեմբերի 12-ին հայտարարությամբ էր հանդես եկել՝ իր և ընկերոջ անունից պատրաստակամություն հայտնելով մոտ 6 միլիոն դոլար փոխանցել պետությանը: Այս փոխանցումը, սակայն, մինչ այս պահը չի կատարվել։ Այս մասին Factor.am-ին ասաց Ղազարյանի պաշտպան Արմեն Հարությունյանը։
Դատախազությունը, հիշեցնենք, օրեր առաջ հայտարարեց, որ Վաչագան Ղազարյանը պետությանը հանցագործությամբ պատճառված վնասը վերականգնել է և իրենք չեն պնդում նրան կալանավորելու վերաբերյալ իրենց Վերաքննիչ բողոքը։ Պաշտպանից հետաքրքրվեցինք, թե ինչպես է Ղազարյանը վերականգնել այդ վնասը, արդյոք նա գումար է վճարել, եթե այո, ապա որքա՞ն: «Այն վճարումները, որոնց մասին հրապարակումներ եղան մամուլում՝ կապված 6 միլիոնի հետ, չեն եղել, մնացած հարցերի մասին էլ հստակ պատասխան կունենանք դատարանի որոշումը ստանալուց հետո»,- եզրափակեց պաշտպանը։
Հիշեցնենք, որ Վաչագան Ղազարյանին մեղադրանք էր առաջադրվել ապօրինի հարստացման համար, այսինքն՝ նա ՀՀ բարձրաստիճան պաշտոնատար անձանց էթիկայի հանձնաժողով ներկայացրած հայտարարագրերում թաքցրել է իր ունեցած դրամական միջոցների իրական չափի մասին հայտարարագրման ենթակա տվյալները: Վաչագան Ղազարյանը կալանավորվել էր հունիսի 28-ին, սակայն հուլիսի 24-ին 1 մլրդ դրամ գրավը մուծելուց հետո ազատ էր արձակվել։ Դրանից հետո դատարանի որոշմամբ կրկին կալանավորվել էր, ապա դեկտեմբերի 30-ին գրավի դիմաց նորից ազատ արձակվել։ Նա հիմա գտնվում է ազատության մեջ։
Լիլիթ Շաբոյան
