Մենք առաջարկում ենք, որ այս ԱԺ-ն լայն հանրային քննարկումներ ունենա անցած մեծ ավտորիտար ռեժիմին գնահատական տալու հարցի շուրջ. Լևոն Բարսեղյան. ՏԵՍԱՆՅՈՒԹ

Հասարակական մի շարք կազմակերպություններ մշակել ու հրապարակել են «Հայաստանի Հանրապետության վերականգնմանն ուղղված բարեփոխումների» հայեցակարգ։ 66 էջից բաղկացած այս ճանապարհային քարտեզը կոնկրետ լուծումներ է առաջարկում կոնկրետ խնդիրներին։ ՀԿ-ներն այս հայեցակարգն ուղարկել են ԱԺ խմբակցություններին և Կառավարությանը: Այսօր հայեցակարգը ՀԿ ներկայացուցիչները քննարկել են ԱԺ «Իմ քայլը» խմբակցության հետ: ՀԿ-ներն այս հայեցակարգով իրենց տեսլականն են առաջարկում անցումային արդարադատության, կրթության բարեփոխման, կոռուպցիայի դեմ պայքարի և տարածքային համաչափ զարգացման ոլորտներում:

Այս մասին Factor.am-ի հետ զրույցում ասաց Ժուռնալիստների «Ասպարեզ» ակումբի խորհրդի նախագահ Լևոն Բարսեղյանը:

«Մենք առաջարկում ենք, որ այս Ազգային ժողովը լայն հանրային քննարկումներ ունենա անցած մեծ ավտորիտար ռեժիմին գնահատական տալու հարցի շուրջ: Հանրային քննարկումների արդյունքում ԱԺ-ն պետք է գնահատական տա, թույլ տվեք ասեմ՝ պատմական գնահատական, որը պետք է խափանի անցյալի կրկնության ռիսկերը»,- նշեց Բարսեղյանը:

Նախկին իշխանությունների ներկայացուցիչների, նրանց համակիրների կողմից հայտարարվում է, որ հեղափոխական իշխանությունն իր խոստումներից հետ է կանգնում:

Factor.am-ը Լևոն Բարսեղյանից հետաքրքրվեց՝ արդյո՞ք նկատելի են նման միտումներ: Որպես օրինակ նշեցինք արագաչափերից ու կարմիր գծերից ազատվելու կոչերը, որոնք կային հեղափոխության օրերին, իսկ հիմա քայլեր չեն ձեռնարկվում:

«Այդ օրերին տարբեր հասարակական, քաղաքական գործիչներ տարբեր ակցիաներ էին իրականացնում: Ես, օրինակ, փող էի մուրում Սերժիկ Սարգսյանի համար, քանի որ նա ասել էր, որ փողի կարիք ունի: Մեկ ուրիշը բողոքում էր արագաչափերից: Հավաքական դիրքորոշում այդ մանր հարցերի հետ կապված չկար, կար ընդհանրական որոշում, որ այդ ռեժիմը չպետք է շարունակի: Ես նման տպավորություն չունեմ, որ խոստումներից հետ կանգնող է»,- ասաց նա:

Մանրամասները՝ տեսանյութում:

Նարեկ Կիրակոսյան