02.07.2026 | 14:43
Իրանը զգուշացնում է ԱՄՆ-ին և Իսրայելին Խամենեիի հուղարկավորության արարողությունից առաջ հարձակումների դեմ
Հայաստանի և Ադրբեջանի ղեկավարներն ընդունել են հանդիպելու առաջարկը. ԵԱՀԿ ՄԽ համանախագահներ
Քաղաքականություն
01.03.2019 | 16:49
ԵԱՀԿ Մինսկի խմբի համանախագահները (Իգոր Պոպովը Ռուսաստանից, Ստեֆան Վիսկոնտին՝ Ֆրանսիայից և Էնդրյու Շոֆերն ԱՄՆ-ից ) փետրվարի 20-ին Երևանում հանդիպում են ունեցել Հայաստանի վարչապետ Նիկոլ Փաշինյանի և փետրվարի 21-ին՝ Բաքվում, Ադրբեջանի նախագահ Իլհամ Ալիևի հետ։ Հանդիպումների ընթացքում նրանք քննարկել են մոտ ապագայում երկու ղեկավարների հանդիպման նախապատրաստական աշխատանքները, ինչպես նաև քննարկման հնարավոր թեմաները։ Հայաստանի և Ադրբեջանի մայրաքաղաքներում համանախագահները նաև քննարկումներ են ունեցել երկու երկրների արտաքին գործերի նախարարների հետ։ Համանախագահներին միացել է նաև ԵԱՀԿ գործող նախագահի անձնական ներկայացուցչի դեսպան Անդրեյ Կասպրչիկը։
Տարածաշրջանային հանդիպումների ընթացքում Հայաստանի և Ադրբեջանի ղեկավարները համանախագահների հետ ճեպազրույց են ունեցել՝ հունվարին Դավոսում Համաշխարհային տնտեսական ֆորումի շրջանակում տեղի ունեցած հանդիպման վերաբերյալ։ Ղեկավարներն ու համանախագահները քննարկել են տիրող իրավիճակը և հաջորդող քայլերից իրենց սպասելիքները։
Համանախագահները շփման գծում զոհերի թվի նվազումը դրական են գնահատել։
Նրանք նաև ողջունել են երկու երկրների բնակչությանը խաղաղության նախապատրաստելու մասին տարածաշրջանում զարգացող քննարկումները։
Փաշինյանն ու Ալիևն ընդունել են Մինսկի խմբի՝ մոտ ապագայում վերջինիս հովանու ներքո հանդիպման առաջարկը։
Տարածաշրջան այցից հետո, Մինսկի համանախագահներն ու ԵԱՀԿ գործող նախագահի անձնական ներկայացուցչի դեսպանը մեկնել են Վիեննա և Բրատիսլավա՝ ճեպազրույց ունենալու ԵԱՀԿ Մինսկի խմբի երկրների մշտական ներկայացուցիչների, ԵԱՀԿ գլխավոր քարտուղար Թոմաս Գրեմինգերի, ինչպես նաև ԵԱՀԿ գործող նախագահ Միրոսլավ Լայչակի հետ։
Նելլի Մելքոնյան
