12.03.2026 | 10:45
22 միլիոն դրամ՝ «Հոգևոր-մշակութային հանրային Հ/Ը» -ի լուծարման գործընթացը վերջնականացնելու համար
«Նախաճաշ նախարարի հետ» ձևաչափի շրջանակում հանդիպել են Զոհրաբ Մնացականյանն ու ԱՏՁՄ վարչության անդամները
Քաղաքականություն
01.03.2019 | 15:33
Առաջատար տեխնոլոգիաների ձեռնարկությունների միության (ԱՏՁՄ) վարչության անդամները «Նախաճաշ նախարարի հետ» ձևաչափի շրջանակում հանդիպել են ՀՀ արտաքին գործերի նախարար Զոհրաբ Մնացականյանին՝ առաջիկա համատեղ ծրագրերն ու համագործակցության նոր ուղիներ մշակելու համար:
ԱԳ նախարար Զ. Մնացականյանը, կարևորելով ՀՀ Կառավարության բարձր տեխնոլոգիաների ոլորտին ուղղված քաղաքականությունն ու տեսլականը, պատրաստակամություն է հայտնել սերտորեն համագործակցել ՏՀՏ համայնքի հետ: Մասնավորապես խոսվել է համատեղել Հայաստանի բարձր տեխնոլոգիական բրենդի առաջխաղացմանն ուղղված աշխատանքները ՀՀ արտաքին քաղաքականության շրջանակներում:
ԱՏՁՄ-ն հանդես կգա որպես ԱԳ նախարարության գործընկեր՝ բարձր տեխնոլոգիաների արտաքին քաղաքականության կարիքներն ու հնարավորություններն ուսումնասիրելու և համատեղ լուծման ուղիներ մշակելու համար:
Կողմերը նաև համաձայնել են համագործակցել նոր շուկա գրավելու՝ մասնավորապես Աֆրիկայի երկրներ ՏՏ լուծումներ արտահանելու գործում:
ԱԳ նախարար Զ. Մնացականյանի հետ հանդիպմանը մասնակցել է ԱՏՁՄ վարչությունը, որի կազմում են եղել ԱՏՁՄ նախագահ Ալեքսանդր Եսայանը, գործադիր տնօրեն Կարեն Վարդանյանը, Վահագն Պողոսյանը (Է-Հայք), Մանուկ Հերգնյանը (Գրանատուս Վենչուրս), Վահրամ Մերանգուլյանը (ԱյՅուՆեթվորքս), Գևորգ Սաֆարյանը (Լայմթեք), Սոֆի Մեհրաբյանը (Մակադամիան ԷյԱր), Իրինա Դումանյանը (Մենթոր Գրաֆիկս Դիվելոփմենթ Սերվիսիս), Վասիլ Մամիկոնյանը (Էս Էֆ Էլ), Արմեն Քոչարյանը (ՎՕԼՕ) և Թամար Գևորգյանը:
Նշենք, որ ԱՏՁՄ-ն «Նախաճաշ նախարարի հետ» ձևաչափն իրականացնում է արդեն ութ տարի: Այն Միության անդամներին հնարավորություն է տալիս ՀՀ նախարարների հետ ազատ մթնոլորտում քննարկել ոլորտային թեմաներ: Հանդիպումների ընթացքում վեր են հանվում ՏՀՏ ոլորտի շահերի պաշտպանության հիմնական ուղղությունները, պետության և մասնավոր հատվածի համագործակցության, տեխնոլոգիական կրթության, աշխատուժի զարգացմանն ուղղված և այլ արդիական հարցեր:
