16.01.2026 | 20:45
Եպիսկոպոսը դատի է տվել Մայր Աթոռին, կաթողիկոսը՝ սառեցրել թեմի հաշիվները. ՏԵՍԱՆՅՈՒԹ
Մարտի 1-ի գործով մեղադրյալ Սեյրան Օհանյանը հրաժարվել է ցուցմունք տալ․ նա մեկ այլ քրեական գործով էլ ունի վկայի կարգավիճակ
Հասարակություն
01.03.2019 | 13:33
Սահմանադրական կարգի տապալման համար մեղադրվող պաշտպանության նախկին նախարար Սեյրան Օհանյանը, որը 2008 թվականին ՊՆ Զինված ուժերի գլխավոր շտաբի պետն էր, հրաժարվել է ցուցմունք տալուց։ Այս մասին Factor.am-ի հետ զրույցում ասաց վերջինիս պաշտպան Ինեսսա Պետրոսյանը:
«Ըստ անհրաժեշտության վարույթն իրականացնող մարմինը իրականացրել է քննչական գործողություններ, որոնց մասնակցել է պարոն Օհանյանը, դրանց մասին ես չեմ կարող բարձրաձայնել, բայց նա հրաժարվել ընդհանրապես ցուցմունքներ տալուց»,-հայտնեց պաշտպանը։
Անդրադառնալով մամուլում առկա հրապարակումներին, թե Մեղրիի երկաթգծերի վաճառքի հետ կապված մեկ այլ քրեական գործի շրջանակներում Սեյրան Օհանյանն ու Սերժ Սարգսյանը առերեսվել են, պաշտպանը ասաց․ «Այդ գործով Սեյրան Օհանյանն ունի վկայի կարգավիճակ, նախաքննություն է ընթանում և գաղտնիության ռեժիմ է առկա, ոչինչ բարձրաձայնել չեմ կարող»։
Հավելենք, որ Սեյրան Օհանյանն իրեն առաջադրված մեղադրանքները չի ընդունում։ Նա, անդրադառնալով մեղադրանքներին, գրել էր հետևյալը․ «Այս ամենը ես որակում եմ Մարտի 1-ի ցավալի դեպքերի բացահայտումը դեպի փակուղի տանող բացահայտ ինքնանպատակ ճանապարհ, իսկ գործի շրջանակներում առաջադրվող մեղադրանքների տրամաբանությունը հուշում է, որ բացառված չեն նոր «ստեղծագործական մոտեցումները»։
Այսօր ՀՔԾ-ն հայտարարել էր, որ վերացրել է Պաշտպանության նախկին նախարար Սեյրան Օհանյանի կենսաթոշակային հաշվեհամարի վրա դրված կալանքը։ Պաշտպանը հաշվեհամարներին դրված կալանքը որակեց անօրինական․ «Մեղադրանք առաջադրելուց հետո իրենք որոշել են արգելանք դնել, իհարկե, մենք գտնում ենք, որ այդ ամենը անօրինական է, քանի որ ի սկզբանե էլ ասել էինք, որ պարոն Օհանյանին առաջադրված մեղադրանքը ևս անօրինական է և շինծու»։
Լիլիթ Շաբոյան
