Հասարակություն
28.02.2019 | 20:15Եթե որևէ մեկը փորձի ՀՀ սահմանադրական կարգի նկատմամբ ոտնձգություն կատարել, կարժանանա օրենքի սահմաններում կոշտ գնահատականների: ԱԺ-ում լրագրողների հետ ճեպազրույցի ժամանակ ասաց ՀՀ ոստիկանապետ Վալերի Օսիպյանը՝ անդրադառնալով «Սասնա Ծռեր» կուսակցության համակարգող Ժիրայր Սեֆիլյանի այն հայտարարությանը, որ իրենց համբերության բաժակը լցվել է, և եթե իրենց երկու կալանավորված ընկերներին ազատ չարձակեն, բողոքի ակցիաներ կսկսեն:
«Ով ուզում է՝ լինի, ոստիկանությունը գործելու է օրենքի սահմաններում, ոստիկանությունը տիրապետում է բոլոր տվյալներին»,- ասաց Օսիպյանը:
Ճշտող հարցին՝ այսինքն տեղյա՞կ է, որ ինչ-որ գործողություններ են նախապատրաստվում, Օսիպյանը հստակ պատասխան չտվեց. «Ոստիկանությունն ունի շատ-շատ ինֆորմացիաններ՝ օրենքի սահմաններում ձեռք բերված, որոնք հրապարակման ենթակա չեն: Այո՛, մենք տիրապետում ենք բոլոր տվյալներին: Եթե մի քանի հոգի փողոց են փակում, և եթե ոստիկանությունն անմիջապես հետո չի բացում, դա չի նշանակում, որ չի կարող: Մենք կարող ենք հաշված րոպեների ընթացքում այդ ամենը բացել ու վերականգնել երթևեկությունը: Եվ միայն Ժիրայր Սեֆիլյանի պարագայում չէ, այլ ցանկացած դեպքում, եթե որևէ մեկը ՀՀ-ում որևէ կարգ խախտի, ՀՀ օրենքի սահմաններում գնահատականների կարժանանա»,- ասաց նա:
Դիտարկմանը, որ հայտարարության տեքստում նաև ապստամբությունից էր խոսվում, Օսիպյանը պատասխանեց, որ օրենքի խախտման պարագայում կոշտ գնահատական կլինի. «Ավելին չեմ կարող ասել»:
Մանրամասները՝ տեսանյութում:
Նարեկ Կիրակոսյան
