08.06.2026 | 21:45
Ջրվեժի գերեզմանատան մոտ մեքենա է այրվել
Զախարովան՝ Բաքվի ակցիային ռուսաստանցի խորհրդարանականների մասնակցության մասին
Քաղաքականություն
28.02.2019 | 17:54
Ղարաբաղյան արյունալի հակամարտությունը մահ և տառապանք բերեց բազմաթիվ անմեղ մարդկանց, և Ռուսաստանը շարունակում է այն մեծ ողբերգություն համարել: Այս մասին լրագրողների հետ հանդիպմանն ասել է ՌԴ ԱԳՆ պաշտոնական ներկայացուցիչ Մարիա Զախարովան: Մեկնաբանելով ռուսաստանցի խորհրդարանականների՝ Ադրբեջան այցի և Բաքվում անցկացված հակահայկական ակցիային նրանց մասնակցության մասին հարցը՝ Զախարովան ասել է, որ Ռուսաստանի ԱԳՆ-ն Ադրբեջան նրանց այցի համակազմակերպիչը չէ: Նա նաև խորհուրդ է տվել բոլոր հարցերի պատասխանը ստանալու համար դիմել հենց ակցիայի մասնակիցներին:
«Ղարաբաղյան արյունալի հակամարտությունը մահ և տառապանք բերեց բազմաթիվ անմեղ մարդկանց՝ և՛ հայերի, և՛ ադրբեջանցիների: Ռուսաստանը միշտ դա համարել և շարունակում է համարել հսկայական ողբերգություն: Ինձ թվում է՝ դա հայտնի դիրքորոշում է, բայց կցանկանայի ևս մեկ անգամ վերահաստատել»,- ասել է ՌԴ ԱԳՆ պաշտոնական ներկայացուցիչը:
Նա նաև հավելել է, որ Ռուսաստանը միշտ շահագրգռված է եղել ղարաբաղյան հակամարտության կարգավորմամբ. «Մեր երկիրը զգալի ջանքեր է գործադրում՝ այդ հակամարտության խաղաղ կարգավորման ուղիներ գտնելու համար: Մենք այսուհետ նույնպես դրան առաջնային ուշադրություն ենք հատկացնելու»:
Հիշեցնենք, որ փետրվարի 26-ին Բաքվում «Խոջալուի իրդարձություններին» նվիրված երթ է անցկացվել, որին մասնակցել են ռուսաստանցի պատգամավորներ Օքսանա Պուշկինան, Դմիտրի Սավելևը և Իրինա Ռոդնինան: Վերջինը հայ-ռուսական միջխորհրդարանական հանձնաժողովի անդամ է, նրա անունով է կոչվում Երևանում գործող գեղասահքի դպրոցը:
