02.07.2026 | 12:36
ՌԴ-ն Ուկրաինայի դեմ 74 հրթիռ և շուրջ 500 ԱԹՍ է կիրառել․ Կիևում զոհերի թիվը հասել է 13-ի
ԱՄՆ Կոնգրեսի հայկական հարցերով հանձնաժողովի համանախագահ Ֆրենկ Փալոնեն դատապարտել է Սումգայիթի ջարդերը
28.02.2019 | 16:59
ԱՄՆ Կոնգրեսի հայկական հարցերով հանձնաժողովի համանախագահ Ֆրենկ Փալոնեն հանդես է եկել Սումգայիթի ջարդերի 31-րդ տարելիցի մասին հայտարարությամբ․ այս մասին տեղեկանում ենք Ամերիկայի Հայ Դատի հանձնախմբի (ANCA) ֆեյսբուքյան էջից:
Հայտարարության մեջ մասնավորապես նշվում է․
«1988-ի փետրվարի 27-ին Սումգայիթ քաղաքում ապրող հարյուրավոր հայեր են սպանվել, բռնաբարվել, խոշտանգվել և, նույնիսկ, կենդանի այրվել։ Եվ այդ ամենը նրանց ծագման պատճառով։
Տասնամյակների ընթացքում Ադրբեջանը քայլեր է ձեռնարկել՝ թաքցնելու համար մարդկության դեմ գործած այս հանցանքը և ժխտել Սումգայիթում տեղի ունեցած վայրագությունները։ Ավելի անհանգստացնող է այն, որ հանցագործներն Ադրբեջանի կառավարության կողմից ազգային հերոս են ճանաչվել։
Կարևոր է, որ ԱՄՆ կառավարությունը ճանաչի և դատապարտի տեղի ունեցածը։ Ահա ինչու եմ այս սարսափելի կոտորածը դատապարտելու ճանապարհին շարունակում կանգնել հայ ժողովրդի կողքին։ Ցավոք, Սումգայիթի ջարդերից ի վեր, հայերի նկատմամբ ադրբեջանական կառավարության մոտեցումը շատ չի փոխվել։ Մենք մինչ օրս լսում ենք նույն բռնի հռետորաբանությունը և ականատես լինում Արցախի Հանրապետության ժողովրդին ուղղված ահաբեկչական մարտավարությանը։
Մարդկության դեմ գործած հացանքները չդատապարտելով և թույլ տալով նրանց անպատիժ մնալ, մենք միայն կուժեղացնենք այն մարդկանց, որոնք ձգտում են ապագայում կրկնել այդ հանցանքները։ Սա կարևոր է հաշվի առնել հատկապես հիմա, երբ ապրիլին կլրանա Հայոց Ցեղասպանության 104-րդ տարելիցը»։
Նելլի Մելքոնյան
