02.07.2026 | 12:36
ՌԴ-ն Ուկրաինայի դեմ 74 հրթիռ և շուրջ 500 ԱԹՍ է կիրառել․ Կիևում զոհերի թիվը հասել է 13-ի
Կառավարությունը նախորդ ծրագրի կատարման ընթացքի և արդյունքների մասին զեկույցը կներկայացնի Ազգային ժողով
Քաղաքականություն
28.02.2019 | 14:23
Կառավարությունը հավանություն է տվել ՀՀ կառավարության ծրագրի կատարման ընթացքի և արդյունքների մասին զեկույցին, որը կներկայացվի ՀՀ Ազգային ժողով:
«Զեկույցն ունի կառավարության ծրագրի միևնույն կառուցվածքը, ըստ այդմ բոլոր շահագրգիռ նախարարությունների ու գերատեսչությունների ղեկավարներն ըստ ոլորտների ինտենսիվ աշխատել են հատվածների վրա: Բոլոր այն կետերը կամ դրույթները, որոնց անդրադարձ չի կատարվել, արտացոլված են նոր ծրագրում: Ըստ այդմ` բոլոր հարցերն ու ամբողջ տեղեկատվությունն ընդունված է»,-նշել է փոխվարչապետ Մհեր Գրիգորյանը:
Հաստատվել է նաև ՄԱԿ-ի Անվտանգության խորհրդի «Կանայք, խաղաղություն և անվտանգություն» համապատասխան բանաձևի դրույթների իրականացման գործողությունների 2019-2021 թթ. ազգային ծրագիրը և ծրագրի իրականացման ժամանակացույցը:
Հիմնավորման համաձայն՝ ՄԱԿ-ի Անվտանգության խորհրդի «Կանայք, խաղաղություն և անվտանգություն» խորագրով բանաձևն անդրադառնում է կանանց նկատմամբ զինված հակամարտությունների ազդեցությանը, զինված հակամարտությունների կանխարգելման, կարգավորման և խաղաղաշինության գործընթացին կանանց ներգրավմանը:
Ծրագիրն հնարավորություն կտա ՄԱԿ-ի Անվտանգության խորհդի բանաձևի դրույթները տեղայնացնելու շնորհիվ լուծում տալ ՀՀ-ի համար կարևորություն ներկայացնող մի շարք հարցերի: Մասնավորապես՝ ուշադրության կենտրոնում պահել սահմանամերձ համայնքներում կանանց տնտեսական, սոցիալական զարգացման խնդիրները, ապահովել տեղահանված կանանց և աղջիկների հատուկ պաշտպանվածությունը, նպաստել խաղաղապահ առաքելություններում կանանց ներգրավմանը և այլն:
Աղավնի Սուքիասյան
