Քաղաքականություն
28.02.2019 | 12:25ԱԺ պետական-իրավական հարցերի մշտական հանձնաժողովի փետրվարի 28-ի նիստում սուր բանավեճ տեղի ունեցավ «Իմ քայլը» խմբակցության պատգամավոր Սիսակ Գաբրիելյանի և ԼՀԿ-ից Էդմոն Մարուքյանի միջև:
Հիշեցնենք, որ խորհրդարանական հանձնաժողովում քննարկվող նախագծով առաջարկվում է 2004 թվականի հունիսի 9-ից մինչև 2018 թվականի նոյեմբերի 1-ը կալանավորների՝ մինչև դատավճռի օրինական ուժի մեջ մտնելը կալանքի տակ պահելու ժամկետը մեկ օրվա փոխարեն հաշվարկել մեկուկես օր: Սիսակ Գաբրիելյանն այս նախագծի վերաբերյալ նշեց, որ համաներում է եղել, շատ կալանավորների պատժի չափը կրճատվել է, այնուհետև խոսեց տուժողների շահերից:
«Տուժողի շահերն այստեղ հաշվի առե՞լ եք: Դժգոհությունները շատ են, որ գողություններն ավելացել են: Եթե կալանավորների մեկ օրը մեկուկես դարձնենք, շատ անձինք կհայտնվեն ազատության մեջ: Բացի այդ՝ Դուք ունե՞ք թվեր, տվյալներ, թե քանի մարդ դուրս կգա այս նախագծով»,- հարցրեց պատգամավորը:
Էդմոն Մարուքյանը նշեց, որ տուժողի շահերի հետ նախագիծը կապ չունի:
«Մենք համաներում չենք իրականացնում, նաև չենք ասում, թե որևէ մեկին ներում ենք: Մենք ասում ենք և ուզում ենք այն վերականգնել: Ռուսաստանում էլ է այդ օրենքն ընդունված»,- ասաց նա:
Անդրադառնալով Գաբրիելյանի՝ հանցագործությունների աճի մասին հարցին՝ Էդմոն Մարուքյանը նշեց, որ տվյալներ չունի, բայց այդ հարցն իրեն չպետք է ուղղել:
«ՀՀ-ն ունի ոստիկանություն, ոստիկանապետ, իրենք պետք է աշխատեն: Եթե շատացել է, պետք է համեմատության մեջ տեսնել՝ կա՞ նման բան, եթե կա, տեսնենք ինչումն է խնդիրը, բայց քանի որ Ձեր իշխանությունը չի ուզում ոստիկանությունը դարձնել նախարարություն, մենք խորհրդարանական վերահսկողություն չունենք: Ոստիկանապետը չի գալիս խորհրդարան, որ հարցնենք: Չգիտենք՝ ինքը որտեղ է, ո՞նց հարցնենք, որևէ տվյալ չենք կարող ունենալ, հետևաբար, այս անվերահսկելի վիճակում նման հարցեր են ծագում: Չգիտենք՝ արդյոք ոստիկանությունը լա՞վ է աշխատում, որ կա հանցագործությունների աճ, թե՞ վատ է աշխատում, ու կա հանցագործությունների աճ: Մեղքը խորհրդարանականներինը չէ»,- ասաց նա:
Սիսակ Գաբրիելյանն էլ հակադարձեց, որ այսօր ոստիկանապետը ժամը 16:00-ին խորհրդարանում է լինելու: «Եթե ԱԳ նախարարին կանչել ու խոսել եք, կարծում եմ՝ կարող էիք ոստիկանապետին էլ կանչել ու խոսել, և վերահսկողությունը կլիներ»,- ասաց Գաբրիելյանը:
Մանրամասները՝ տեսանյութում:
Նարեկ Կիրակոսյան
