Դեսպան նշանակվելուց հետո ԱԺ հրավիրելու ԼՀԿ-ական պատգամավորների օրենսդրական նախաձեռնությունը Կառավարությունը մերժեց․ ՏԵՍԱՆՅՈՒԹ

Ազգային ժողովի «Լուսավոր Հայաստան» խմբակցությունն օրենսդրական նախաձեռնություն է ներկայացրել Կառավարությանը՝ առաջարկելով  ՀՀ Ազգային ժողովի արտաքին հարաբերությունների ոլորտի մշտական հանձնաժողովի լիազորությունները լրացնելու միջոցով սահմանել, որ հանձնաժողովը կազմակերպի հանդիպում հանձնաժողովի անդամների և օտարերկրյա պետություններում և միջազգային կազմակերպություններում հավատարմագրված Հայաստանի Հանրապետության դեսպանների և դիվա­նագիտա­կան ներկայացուցչությունների ղեկավարների հետ՝  նրանց առաջադրվելուց հետո՝ մինչև նշանակվելը:

Նախագծով առաջարկվում է դիվանագիտական ներկայացուցիչների նշա­նակման գործընթացում ունենալ նաև խորհրդարանի մասնակցությունը, որը կարող է որպես հակակշռող և զսպող գործոն կիրառվել նախագահական կառավարման ձև ունեցող այն հանրապետություններում, որտեղ միանձնյա նշանակողը (նախագահը կամ նախագահի կողմից նշանակված վարչա­պե­տը) և նշանակումը հաստատողը (խորհրդարանը) ձևավորվում են միմ­յանցից անկախ ընտ­րա­կարգերով և մեկը մյուսի իշխանության աղբյուր չեն հանդիսանում։

Կառավարությունը մերժեց ԼՀԿ-ական պատգամավորների ներկայացրած օրենսդրական նախաձեռնությունը՝ հիմնավորելով, որ գործադիր իշխանության կադրային քաղաքականության իրականացման խորհրդարանական հակակշռման և զսպման մե­խա­նիզմի առկայությունն արդարացված չէ այն պարագայում, երբ գոր­ծադիր իշխանության ձևա­վոր­ման և դրա ղեկավարի ընտրության իրավունքն ինքնին պատ­կա­նում է բացառապես խորհրդա­րանին։

Բացի դրանից, պարզ չէ՝ որն է նախքան դիվանագիտական ներկայա­ցու­ցիչների նշանա­կումը արտաքին հարաբերությունների ոլորտի մշտական հանձնաժողովի անդամների հետ առաջադրված անձանց հանդիպման իրավական հետևանքը։

Մանրամասները՝ տեսանյութում։

Աղավնի Սուքիասյան