«Իմ քայլ»-ում Դավիթ Սանասարյանին ուղղված հարցեր ունեն. ՏԵՍԱՆՅՈՒԹ

«Իմ քայլը» խմբակցությունում միասնական կարծիք չկա՝ պե՞տք է Պետական վերահսկողական ծառայության պետ Դավիթ Սանասարյանին հրավիրել խորհրդարան՝ հասկանալու համար, թե ինչու են իր ղեկավարած կառույցում երեկ տեղի ունեցել ձերբակալումներ:

«Կոնկրետ ես, այո՛, այս պահի դրությամբ ունեմ հարցեր, սակայն այս պահի դրությամբ առայժմ չկա նման ծրագիր նրան հրավիրելու, բայց մոտ ապագայում կարող է լինել»,- տեղեկացնում է ԱԺ «Իմ քայլը» խմբակցության անդամ Արմեն Խաչատրյանը։

Ճանապարհային ոստիկանության պետի նախկին տեղակալ Արմեն Խաչատրյանը դեռ չգիտի, թե ինչ է կատարվել։ Սակայն նրա համար էական չէ, որ ձերբակալվածները նոր Հայաստանի պաշտոնյաներ են և ոչ թե նախկին կոռումպացվածներ։ Ըստ նրա, «եթե ընդունենք, որ հանցագործություն է կատարվել, օրենքով սահմանված կարգով կենթարկվեն նույն պատասխանատվությանը, ինչ-որ մեկ տարի առաջ, որևէ տարբերակում չկա հնի ու նորի միջև»։

Սիսակ Գաբրիելյանը նույնպես հարցեր ունի Դավիթ Սանասարյանին և միանշանակ կողմ է, որ «Իմ քայլը» խմբակցությունը նրան հրավիրի խորհրդարան լսելու։

«ԱԺ-ն լիազորություն չունի հրավիրելու, քննարկելու, կարող են ոլորտային հանձնաժողովները անել, բայց մենք քաղաքական մեկ թիմ ենք, ի վերջո, կառավարությունը մենք ենք ձևավորում, և կարող է անհրաժեշտություն լինել Դավիթ Սանասարյանին հրավիրելու»,- ասում է ԱԺ «Իմ քայլը» խմբակցության անդամ Սիսակ Գաբրիելյանը։

Պատգամավորը ինֆորմացիայի սղության պատճառները հասկանում է, և չի ասի, թե Ազգային անվտանգության ծառայությունը պարտավոր է ձերբակալման բոլոր փակագծերը միանգամից բացել։ Ըստ նրա, «շատ կարևոր է հասկանալ, որ թափանցիկությունն էլ ունի որոշակի սահման, երբ խոսքը ԱԱԾ-ի մասին է»։

Վահագն Հովակիմյանն ընդհանրապես դեմ է, որ Ազգային անվտանգության ծառայությունը որևէ տեղեկություն տրամադրի, ինքը չի էլ ողջունում, որ այդ կառույցը հեղափոխության առաջին ամիսներին այդքան բաց էր աշխատում։

«Իրենք երբեմն նաև իրենց համար, օրինակ, Եվրադատարանի տեսանկյունից խոցելի են դառնում։ Հետագայում իրենց բացությունը նույն մեղադրյալի փաստաբանները կարող են օգտագործել նախաքննական մարմնի դեմ, ասելով՝ տեսեք, դեռ գործը դատարան չուղարկված, իրենք արդեն մեզ դատապարտել են»,- ասում է ԱԺ «Իմ քայլը» խմբակցության անդամ Վահագն Հովակիմյանը։

Ըստ պարոն Հովակիմյանի, սխալ է նաև Դավիթ Սանասարյանին խորհրդարան հրավիրելը, դեռ նախաքննություն է ընթանում և քանի դեռ այն չի ավարտվել, ինքը չի կարող ասել, թե ինչու պետք է հրավիրեն:

«Շատ գայթակղիչ է էդ գաղափարը, բայց եթե կա նախաքննություն․․․ էս քաղաքական խնդիր չի, քաղաքական օրակարգով պայմանավորված չէ էս երևույթը, կա բողոք, բողոքը քննվում է»,- թեման ամփոփում է պատգամավորը։

Պատգամավորն այս գործում քաղաքական մեծ հնչեղություն չի տեսնում։ Նա վախենում է, որ այս գործին այնպիսի հնչեղություն է տրվում, որ ձերբակալվածներն արդեն ընկալվում են որպես հանցագործ։ Մինչդեռ նոր Հայաստանում պետք է սկսի աշխատել մարդու անմեղության կանխավարկածը։

Մհեր Արշակյան