Արամ Հարությունյանի գործով դատարան կհրավիրվի Սիլվա Համբարձումյանը

Երևանի ընդհանուր իրավասության դատարանը՝ դատավոր Վարդան Գրիգորյանի նախագահությամբ քննում էր առանձնապես խոշոր չափերով կաշառք ստանալու համար մեղադրվող բնապահպանության նախկին նախարար Արամ Հարությունյանի գործը վերաբացելու դեմ նրա պաշտպանների ներկայացրած բողոքը։

Factor.am-ի հետ զրույցում հետախուզվող Արամ Հարությունյանի պաշտպաններից Կարեն Հակոբյանը նշեց, որ այսօր իրենց տեսակետները ներկայացրել են դատարանին, բայց չեն ավարտել, նիստը հետաձգվել է:

Հաջորդ դատական նիստը շարունակվելու է մարտի 12-ին՝ ժամը տա 17.00-ին. «Քննիչն ասաց, որ Սիլվա Համբարձումյանն ուզում է գալ, ասացինք՝ թող գա: Ինքը ներկա է լինելու: Պիտի գործը կարճված մնար, դատախազի որոշումը սխալ է, որով գործը բացվել է»:

Հարությունյանի փաստաբանները համարում են, որ Հարությունյանի և գործով մյուս 3 մեղադրյալների վերաբերյալ գործը վերաբացվել է օրենքի խախտմամբ։

Հիշեցնենք, որ հունվարի 18-ին Երևանի ընդհանուր իրավասության դատարանը բավարարել էր ՀՔԾ-ի միջնորդությունը և կալանավորման որոշում կայացրել Արամ Հարությունյանի նկատմամբ։

Ավելի վաղ ՀՔԾ-ն հայտնել է, որ առանձնապես խոշոր չափերով կաշառք ստանալու դեպքի առթիվ ՀՀ հատուկ քննչական ծառայությունում հարուցված քրեական գործի նախաքննությամբ ձեռք բերված բավարար ապացույցների համակցության հիման վրա Արամ Հարությունյանը որպես մեղադրյալ է ներգրավվել ՀՀ քրեական օրենսգրքի 311-րդ հոդվածի 4-րդ մասի 2-րդ կետով և 190-րդ հոդվածի 3-րդ մասի 1-ին կետով նախատեսված հանրորեն վտանգավոր այն արարքների կատարման համար, որ նա, հանդիսանալով ՀՀ գործադիր իշխանության ղեկավար աշխատող, իր հետ մտերիմ հարաբերությունների մեջ գտնվող անձանց օժանդակությամբ առանձնապես խոշոր չափերով կաշառք է ստացել, ապա՝ օրինականացրել հանցավոր ճանապարհով ստացված առանձնապես խոշոր չափերով գույքը:

Արամ Հարությունյանի նկատմամբ հայտարարվել է հետախուզում:

Լիլիթ Շաբոյան