Այդ հապաղումը վնաս է բերում ո՛չ միայն մեզ, այլ՝ անձամբ Նիկոլ Փաշինյանին․ Գագիկ Եղիազարյան. ՏԵՍԱՆՅՈՒԹ

«Սասնա Ծռեր» կուսակցության անդամներով համալրված «Ազատություն ապստամբներին» նախաձեռնությունը պայքարելու է կալանքի տակ գտնվող Արմեն Բիլյանի և Սմբատ Բարսեղյանի ազատության համար։

Հիշեցնենք, որ նրանք կալանքի տակ են գտնվում դեռևս 2016 թվականից, երբ Երևանի ՊՊԾ գունդը գրավելուց հետո վայր դրեցին զենքերը։ Ինչո՞ւ «Ազատություն ապստամբներին» նախաձեռնությունը չի սպասում դատական պրոցեսների ավարտին, երբ իրավական գնահատական կտրվի այդ անձանց արարքներին։ Այսօր հրավիրված ասուլիսում «Սասնա ծռեր» խմբի անդամ Գագիկ Եղիազարյանը պարզաբանեց, որ վստահության պակաս կա իրավական գործընթացների նկատմամբ․ «Չկա վստահություն Սերժ Սարգսյանի և Ռոբերտ Քոչարյանի հանցավոր սկզբունքներով ձևավորված դատաիրավական համակարգի նկատմամբ։ Պետք է, անհրաժեշտ է անցումային արդարադատություն, որը կանդրադառնա նաև մեր գործողությանը և կգնահատի՝ արդյոք ապստամբության իրավունքի սահմանազանցում եղե՞լ է, արդյոք հնարավո՞ր էր խուսափել մեր գործողությունից, արդյոք մենք մարդասիրության որևէ նորմ խախտե՞լ ենք»։

Փետրվարի 25-ին «Սասնա Ծռեր» կուսակցության առաջնորդ Ժիրայր Սեֆիլյանը հայտարարություն էր տարածել՝ այսպիսի հարց բարձրացնելով․ «Առնվազն տարակուսելի է, որ հեղափոխությամբ պետության ղեկը ստանձնած իշխանությունը, որ իրավամբ շահագրգիռ է Մարտի 1-ի մեղավորներին բացահայտելու գործում, իր բոլոր քայլերով, այդ թվում՝ ծուղակ հիշեցնող անհեթեթ համաներման ակտով, համառորեն մերժում է Մարտի 1 արած ռեժիմի դեմ ապստամբության իրավունքը, իսկ ապստամբներին հանձնում է նրա ծառաների դատաստանին»։

Պարոն Սեֆիլյանը պնդել էր նաև, որ լռելու և իր խոսքով՝ ապստամբների նկատմամբ շարունակվող դատաստանին համբերատար կերպով հետևելու ժամանակը սպառվել է․ «Համբերության բաժակը լցվել է և, եթե Արմեն Բիլյանն ու Սմբատ Բարսեղյանը չազատվեն, մեր ժողովրդի առավել արժանապատիվ ու գիտակից հատվածը կպարտադրի ապստամբության իրավունքի ճանաչումն ու ապստամբների ազատությունը»։

Factor.am-ը հարց ուղղեց «Ազատություն ապստամբներին» նախաձեռնության անդամներին՝ ինչո՞ւ են պահանջ ներկայացնում գործադիր իշխանությանը, որն իրավասու չէ խառնվել դատական գործընթացներին, և օրինակ՝ ազատ արձակել Արմեն Բիլյանին և Սմբատ Բարսեղյանին:

«Այսինքն՝ դատական համակարգն ամենաուժե՞ղն է, ինչ ուզենա կանի՞։ Նիկոլ Փաշինյանը ժողովրդի կողմից մանդատ է ստացել՝ մեր երկրում իրականացնելու փոփոխություններ, այդ թվում նաև դատական համակարգում»,- ասաց Սերգեյ Կյուրեղյանը։

Պատասխանելով նույն հարցին, Գագիկ Եղիազարյանն ավելացրեց․ «Պարոն Սեֆիլյանն այսօր դա համարում է բացթողում, միգուցե պարոն Փաշինյանը համարում է, որ պետք է վաղը դրան անդրադառնալ, միգուցե պարոն Փաշինյանն իր տեսանկյունից համարում է, որ ճիշտ է գնալ մեկ այլ հերթականությամբ, և ոչ այնպես, ինչպես մենք ենք պատկերացնում։ Մենք կիսում ենք պարոն Սեֆիլյանի այն տեսակետը, որ պետք է անցումային արդարադատության հարցում չհապաղել։ Այդ հապաղումը վնաս է բերում ո՛չ միայն մեզ, այլ ողջ հայ ժողովրդին և անձամբ Նիկոլ Փաշինյանին, լրջագույն վնաս է բերում, երբ նախորդ ռեժիմի ներկայացուցիչներն իրենց ամբողջ ռեսուրսներով հանդերձ շարունակում են ազատ գործել և ապազգային գործունեություն ծավալել»։

Ռոբերտ Անանյան