15.01.2025 | 23:34
Իսրայելն ու ՀԱՄԱՍ-ը հրադադարի համաձայնագիր են ստորագրել
Վիզաների ազատականացման երկխոսության մեկնարկը քաղաքական որոշում է․ ԵՄ դեսպանը ժամկետներ նշել չկարողացավ. ՏԵՍԱՆՅՈՒԹ
Քաղաքականություն
26.02.2019 | 13:28
Չեմ կարող կոնկրետ ժամկետ կամ ամսաթիվ ասել, սակայն Եվրահանձնաժողովը դրական է տրամադրված վիզայի ազատականացման երկխոսության մեկնարկի կապակցությամբ: Փետրվարի 26-ին լրագրողների հետ հանդիպմանն այս մասին ասաց Հայաստանում ԵՄ պատվիրակության ղեկավար, դեսպան Պյոտր Սվիտալսկին՝ պատասխանելով վիզայի ազատականացման շուրջ բանակցությունների մեկնարկի մասին հարցին:
Դիվանագետի խոսքով՝ այս գործընթացը երկու կողմ ունի՝ քաղաքական և գործնական:
«Նախկինում էլ հիշատակել ենք, որ վիզայի ազատականացման երկխոսություն սկսելը քաղաքական որոշում է, և վերջնական խոսքը պետք է ասեն ԵՄ անդամ պետությունները: Բացի այդ՝ կան հարցադրումներ, որոնք կապված են վիզայի դյուրացման ռեժիմի իրականացման հետ, այսինքն այն, թե ինչպես են իրականացվում հայաստանցիների այցերը եվրոպական երկրներ»,- նշեց Պյոտր Սվիտալսկին:
ԵՄ պատվիրակության ղեկավարի խոսքով՝ շատ անկեղծ երկխոսություն են ունեցել հայկական կողմի հետ, և հայկական կողմը շատ հստակ գիտի, թե ինչպիսի մտահոգություններ ունեն ԵՄ առանձին անդամներ:
«Այդ երկխոությունը հնարավոր է, եթե լավ կառավարվող և անվտանգ տեղաշարժի ապահովման երաշխիքներ և մեխանիզմներ կան: Եկեք լավատես լինենք, որ այս պայմանները կապահովվեն»,- հավելեց նա:
Ինչ վերաբերում է արդարադատության ոլորտում բարեփոխումներին, Սվիտալսկիի խոսքով՝ հեղափոխությունից հետո Եվրամիությունը մուտք է գործել շատ համապարփակ երկխոսության փուլ արդարադատության ոլորտի բարեփոխումների կապակցությամբ:
«Մենք մշտական շփումներ ունենք արդարադատության նախարարության և բոլոր պատկան մարմինների հետ, որպեսզի առաջ շարժվենք այս ուղղությամբ: Մենք հասկանում ենք, որ բարեփոխումների նախապատրաստմանն ուղղված գործընթացը դեռևս շարունակական փուլում է, և մենք կարծում ենք, որ սա խիստ էական է Հայաստանի համար»,- նշեց Պյոտր Սվիտալսկին:
Մանրամասները՝ տեսանյութում:
