18.05.2026 | 19:00
Փաշինյանը չպիտի պրովոկացիաներին տրվի, փայլուն գիտի՝ ՌԴ-ն ինչեր է ծրագրել իր սատելիտ ուժերի միջոցով․ Աղասի Թադևոսյան
2019թ․ ԵՄ-ն կավելացնի Հայաստանին ուղղված ֆինանսական օգնությունը․ Սվիտալսկի. ՏԵՍԱՆՅՈՒԹ
Քաղաքականություն
26.02.2019 | 12:10
2019 թ. Եվրամիության հովանոցային ֆոնդից Հայաստանին ուղղված ֆինանսական աջակցությունը կավելանա: Փետրվարի 26-ին լրագրողների հետ հանդիպմանն այս մասին ասաց Հայաստանում Եվրամիության պատվիրակության ղեկավար, դեսպան Պյոտր Սվիտալսկին:
«2018թ. գործողությունների ծրագիրը ցույց է տալիս 20-25 տոկոս ավելացում Հայաստանին մեր ֆինանսական հանձնառության: Հանձնակատար Յոհաննես Հանը Երևանում հանդես եկավ հայտարարությամբ՝ ասելով, որ հովանոցային ֆոնդի շրջանակում Հայաստանի համար նախատեսված աջակցության էական ավելացում է լինելու»,- ասաց Պյոտր Սվիտալսկին:
ԵՄ պատվիրակության ղեկավարի խոսքով՝ անցյալ տարի այս ծրագրի պատմության ընթացքում առաջին անգամ հովանոցային ֆոնդից Հայաստանը ստացավ 10 մլն եվրո, ինչը, նրա հավաստմամբ, կարևոր քաղաքական ազդակ է:
«Հովանոցային ֆոնդի անդամ լինելու փաստն է՛լ ավելի կարևոր է, քան ֆոնդից ստացված գումարի չափը, որովհետև այս ֆոնդը քաղաքական միջոց է: Այն առաջարկվում է այն դեպքում, երբ ճանաչվում է, որ երկիրն առաջընթաց է արձանագրել քաղաքական բարեփոխումների ճանապարհին: Եվ այն փաստը, որ անցյալ տարի Հայաստանն առաջին անգամ այս ֆոնդի շահառուն դարձավ, արդեն իսկ ազդակ է, որ ԵՄ-ն բարձր է գնահատում ժողովրդավարական և այլ բարեփոխումների ընթացքը Հայաստանում»,- նշեց դեսպանը:
Պյոտր Սվիտալսկին հույս հայտնեց, որ Հայաստանը կկարողանա ավելի շատ օգտվել ԵՄ-ի տրամադրած աջակցությունից. «Մենք, կարծում եմ, շատ կառուցողական մթնոլորտում ենք հիմա, մեր հայաստանյան գործընկերների հետ քննարկում ենք կոնկրետ ծրագրեր, որոնց շրջանակում նրանք ակնկալում են, որ Եվրամիությունը կնպաստի Հայաստանի զարգացմանը»:
Մանրամասները՝ տեսանյութում:
