10.06.2026 | 17:31
ԱՄՆ Կոնգրես Ադրբեջանում պահվող հայ գերիների ազատ արձակման վերաբերյալ նախագիծ է ներկայացվել
Ճապոնիայի կառավարությունն աջակցում է Հայաստանում ընտրությունները կազմակերպող մարմինների կարողությունների զարգացմանը
Քաղաքականություն
25.02.2019 | 21:02
Այսօր, ՀՀ կառավարությունում, Հայաստանում ՄԱԿ-ի Զարգացման ծրագրի (ՄԱԶԾ) մշտական ներկայացուցիչ Դմիտրի Մարիյասինը և Հայաստանում Ճապոնիայի արտակարգ և լիազոր դեսպան Ջուն Յամադան ստորագրեցին համաձայնագիր՝ պաշտոնապես հայտարարելով ընտրությունները կազմակերպող մարմինների երկարաժամկետ կարողությունների զարգացմանը միտված ծրագրի մեկնարկը. տեղեկացնում են ՀՀ կառավարության լրատվական ծառայությունից:
Միաժամանակ, ՀՀ փոխվարչապետ Մհեր Գրիգորյանը և պրնՄարիյասինը ստորագրեցին Ճապոնիայի կառավարության կողմից ֆինանսավորվող (մեկ միլիոն ԱՄՆ դոլար) և ՄԱԶԾ հայաստանյան գրասենյակի կողմից իրականացվող «Հայաստանում ընտրական գործընթացների աջակցություն – 2» (ՀԸԳԱ-2) ծրագրային փաստաթուղթը։
Հիմնվելով 2018թ․ արտահերթ խորհրդարանական ընտրություններին միջազգային հանրության (Եվրոպական միություն, Գերմանիա, Միացյալ Թագավորություն և Շվեդիա) և ՀՀ կառավարության աջակցության վրա, ՀԸԳԱ-2 ծրագիրը նպատակ ունի ամրապնդել ՀՀ կենտրոնական ընտրական հանձնաժողովի ինստիտուցիոնալ կարողությունները՝ վերջինիս կառուցվածքի և պլանավորման գործընթացների արդիականացման, ռեսուրսների վերակազմակերպման, ներքին ընթացակարգերի և տեղեկատվական ու հաղորդակցական տեխնոլոգիաների բարելավման միջոցով։
Ծրագիրը, ի լրումն այլ գործառույթների, կաջակցի էլեկտրոնային ուսուցման հարթակի ընդլայնմանը, Միջազգային ընտրական տեխնոլոգիաների համաժողովի միջոցով կներկայացնի Հայաստանի փորձը տարածաշրջանում և դրանից դուրս, կնպաստի ընտրական հանձնաժողովների տեղեկատվական տեխնոլոգիաների և այլ կարողությունների զարգացմանը, ինչպես նաև Կենտրոնական ընտրական հանձնաժողովի գործունեության ռազմավարական պլանավորմանը։
ՀԸԳԱ-2-ը համակարգելու է իր գործողություններն այլ միջազգային կազմակերպությունների հետ, որոնք աջակցություն կտրամադրեն ընտրական գործընթացներին ծրագրի շրջանակներից դուրս։
