Մարդիկ մտածում են՝ կփախնենք բանակից, գումարը կմուծենք, կազատվենք. համակարգային լուծում է պետք. Սասուն Միքայելյան. ՏԵՍԱՆՅՈՒԹ

Այս օրենքն ամեն տարի փոփոխության է ենթարկվում, որը հետագայում ավելի է խրախուսում բանակից խուսափողներին, բանակում չծառայողներին: Փետրվարի 25-ին ՀՀ ԱԺ պաշտպանության և անվտանգության հարցերի մշտական հանձնաժողովի նիստում «Սահմանված կարգի խախտմամբ պարտադիր զինվորական ծառայություն չանցած քաղաքացիների մասին» ՀՀ օրենքում փոփոխություն կատարելու մասին օրինագծի քննարկման ժամանակ ասաց «Իմ քայլը» խմբակցության պատգամավոր Սասուն Միքայելյանը:

«Ամեն տարի բերելով՝ մարդիկ մտածում են՝ կփախնենք բանակից, 24-25 տարեկան ենք, մի երեք տարի էլ կթաքնվենք, կգնանք գումարը կմուծենք, կազատվենք: Այս հարցին վերջնական լուծում է պետք տալ»,- հավելեց պատգամավորը:

Սասուն Միքայելյանը հավելեց, որ դեմ չէ այս փոփոխությանը, պարզապես համակարգային փոփոխություն է պետք. «Որ մարդիկ զգաստանան, որ պարտադիր զինվորական ծառայությունը պետք է անցնեն՝ լինեն 24, 25, թե 26 տարեկան: Եթե նորմալ օրենք չգործի, բոլորն էլ կխուսափեն պարտադիր զինվորական ծառայությունից»:

Նշենք, որ օրենքի նախագծով առաջարկվում է սահմանված 2017 թվականի դեկտեմբերի 1-ը բառերը փոխել 2018 թվականի դեկտեմբերի 31-ը բառերով: Հիմնական զեկուցող Գևորգ Գորգիսյանի խոսքով՝ սա հնարավորություն կտա 2018թ. ընթացքում 27 տարին լրացած քաղաքացիներին վերադառնալ Հայաստան և համապատասխան ընթացակարգերով վճարելով համապատասխան գումարը՝ ազատվել քրեական հետապնդումից: Առաջարկ է եղել 2018թ. դեկտեմբերի 31-ի փոխարեն ժամկետ սահմանել 2019թ. մարտի 1-ը, ինչին հանձնաժողովի անդամների կողմից առարկություն չհնչեց:

Մանրամասները՝ տեսանյութում