15.01.2025 | 22:57
ՀԱՄԱՍ-ը Իսրայելի կողմից ոչնչացված բոլոր զինյալներին փոխարինող է գտել․ Բլինքեն
Տեխնոլոգիական ինտենսիվ գյուղատնտեսության ոլորտը Կոտայքում զարգացման ահռելի պոտենցիալ ունի.Ռոմանոս Պետրոսյանն այցելել է «Մավաս Գրուպ» ընկերություն
Տնտեսություն
22.02.2019 | 20:02
Կարևորելով գործարար ոլորտը և պետություն-մասնավոր հատված համագործակցությունը՝ Կոտայքի մարզպետ Ռոմանոս Պետրոսյանը շարունակում է այցեր կատարել մարզի տարբեր ձեռնարկություններ, ուսումնասիրել գործարար միջավայրի ներկայիս վիճակը, ռեսուրսները, խնդիրները. տեղեկացնում են կոտայքի մարզպետարանից:
Այս անգամ մարզպետն աշխատանքային այցով եղել է Կոտայքի մարզի Ջրվեժ խոշորացված համայնքի Ձորաղբյուր բնակավայրում գտնվող, ջերմոցային տնտեսությամբ զբաղվող «Մավաս Գրուպ» ընկերությունում, որը թարմ մրգերի և բանջարեղենի խոշորագույն արտադրողներից և արտահանողներից է:
Մարզպետն ընկերության տնօրեն Արմենակ Մկրտչյանի ուղեկցությամբ շրջել է ջերմոցի տարածքում, ծանոթացել աշխատանքային պայմաններին, աշխատակիցների թվաքանակին, արտադրանքի ներքին և արտաքին սպառման ծավալներին, մշակման գործընթացին:
Մարզպետի դիտարկմամբ, աշխատանքային այս այցերը հնարավորություն են ընձեռում՝ հասկանալու գործարար ոլորտում մարզի պոտենցիալը և զարգացման հեռանկարները, իսկ այցերի նպատակը նաև այն է, որ Հայաստանի մասին ընկալումը սպառող երկրից վերափոխվի արտահանող երկրի:
Ռոմանոս Պետրոսյանն օրենքի և իր լիազորությունների շրջանակում գործուն աջակցություն է հայտնել «Մավաս Գրուպ» ընկերության տնօրենին՝ ոլորտի զարգացման և ներդրումների համար բարենպաստ միջավայրի ապահովման առումով:
«Տեխնոլոգիական ինտենսիվ գյուղատնտեսության ոլորտը Կոտայքում զարգացման ահռելի պոտենցիալ ունի` մեր աշխարհագրական դիրքի, անզուգական ջրի ու կենարար արևի շնորհիվ։ Բնությունից օժտված այս առավելություններին կարող ենք վստահորեն ավելացնել նաև տարածքային կառավարման մարմինների անվերապահ աջակցությունը մեր տնտեսվարողներին` հանուն համախառն ներքին արդյունք ապահովելուն և ևս մեկ աստիճանով մարզում կյանքի որակը փոխելուն միտված հրամայականի» ,-ասել է Ռոմանոս Պետրոսյանը։
«Մավաս Գրուպ» ընկերությունը հիմնվել է 2011 թվականին: Ներկայում և սեզոնին ջերմոցային տնտեսությունում աշխատում են շրջակա բնակավայրերի 120-140 աշխատակիցներ՝ միջինը մինչև 150 000 դրամ աշխատավարձով:
«Մավաս Գրուպ» ընկերությունը հանդիսանում է թարմ մրգերի և բանջարեղենի խոշորագույն արտադրողներից և արտահանողներից մեկը: 20 հա ջերմոցային տնտեսությունը գտնվում է Կոտայքի մարզում: Արտադրությունը հագեցած է միջազգային չափանիշներին համապատասխանող ժամանակակից սարքավորումներով: Ջերմոցները համալրված են նորագույն եվրոպական սարքավորումներով, որոնք, հիմնականում, ներմուծված են Նիդերլանդներից: Արտադրանքն արտահանվում է ԵԱՏՄ շուկա՝ հիմնականում ՌԴ:
Այսօր Կոտայքի մարզի 11 համայնքներում գործող շուրջ 90 հա ջերմոցային տնտեսությունների ընդլայնման ծրագրերից բացի, ևս 17 հա ջերմոցների հիմնադրման աշխատանքներ են տարվում մարզի 4 այլ համայնքներում (Ակունք, Կամարիս, Արամուս և Ալափարս):
Բոլոր չորս նախագծերի շահագործման մեկնարկը նախատեսված է մինչև 2019թ. տարեվերջ։
