Գուցե Սերժ Սարգսյանն ու Ռոբերտ Քոչարյա՞նն էլ սկսեն սատարել «Լիդիան Արմենիա»-ին․ Թ․Ենոքյան. ՏԵՍԱՆՅՈՒԹ

««Լիդիան Արմենիա» ընկերությունը Ամուլսարում հանքարդյունաբերությամբ զբաղվելու համար առաջին անգամ Ջերմուկի բնակիչների կարծիքը որոշել է հարցնել 2011 թվականին․ այդ ժամանակ ընկերության ներկայացուցիչների հետ հանդիպման եկած ջերմուկցիները դեմ արտահայտվեցին այդ ծրագրին, ուստի հիմա այն մարդկանց, ովքեր ասում են, որ մենք հեղափոխությունից առաջ հանքի շահագործման դեմ չենք պայքարել և այն սկսել ենք անել հեղափոխությունից հետո, ուզում եմ հիշեցնել՝ 2011 թվականի այդ հանդիպման վերաբերյալ տեսանյութն առկա է համացանցում»,- այս մասին այսօր Ամուլսարի հանքի շահագործման հետ կապված խնդիրներին անդրադառնալով՝ ասաց ակտիվիստ, լրագրող Թեհմինե Ենոքյանը՝ հանքի շահագործման դեմ պայքարողներին մեղադրողներին հիշեցնելով նաև 2011 թվականից հետո անցկացված բնապահպանական ակցիաները, Կառավարությանն ուղղված նամակ-բողոքներն ու Սյունիքի մարզպետի հետ այդ թեմայով տեղի ունեցած բախումները։

«2015 թվականի ապրիլի 2-ից հետո մենք նաև իրավունքի դաշտում ենք փորձել մեր իրավունքներն իրացնել։ Ազդակիր համայնքի 9 բնակիչներով բարձրաձայնել ենք այդ խնդիրը և հասել ենք այն փուլին, որ նշանակվի նոր փորձաքննություն և կարողանանք բողոքարկել «Լիդիան Արմենիա» ընկերության կողմից Բնապահպանության նախարարությանը ներկայացված բոլոր հիմնավորումները»,- ասաց Թեհմինե Ենոքյանը։

Լրագրող ակտիվիստը նաև նշեց՝ հանքի շահագործման հետ կապված խնդիրների մասին խոսելիս, հարկավոր է հիշել, թե ովքեր են ժամանակին տվել այդ ընկերությանը նման թույլտվություններ։ «Նախկին նախարարներ՝ Արամ Հարությունյան, Արամայիս Գրիգորյան, Արմեն Մովսիսյան, Արծվիկ Մինասյան․ այս մարդիկ են պատասխանատու ստեղծված իրավիճակի համար», – ասաց Ենոքյանը՝ հավելելով․ «Ներկայիս իրավիճակում էլ նախորդ Կառավարության ներկայացուցիչները՝ ի դեմս Արփինե Հովհաննիսյանի, այդ ընկերությանը սատարելու կոչերով են հանդես գալիս։ Միգուցե Սերժ Սարգսյա՞նն էլ սատարի Լիդիանին, Քոչարյա՞նն էլ, այդ ժամանակ հստակ կիմանանք, թե հանցագործների մեծ բրիգադն ի՞նչ թիմերից է բաղկացած»։

Մանրամասները՝ տեսանյութում։

Աղավնի Սուքիասյան