09.03.2026 | 09:30
ՀՀ տարածքում ավտոճանապարհները հիմնականում անցանելի են
«Զինված խմբի» գործով դատական նիստը կրկին չի կայացել․ Արթուր Վարդանյանի պաշտպանը միջնորդել է նրան քաղաքացիական հիվանդանոց տեղափոխել
Հասարակություն
22.02.2019 | 12:47
Երևանի ընդհանուր իրավասության դատարանի Կենտրոնի նստավայրում այսօր պիտի տեղի ունենար Նորք-Մարաշի «Զինված խմբի» գործով հերթական դատական նիստը։ Այն, սակայն, հետաձգվեց, քանի որ ազատամարտիկ Խաչիկ Ավետիսյանի գործով նոր պաշտպան ներգրավելու անհրաժեշտություն կար։
Հաջորդ նիստը կկայանա մարտի 15-ին։
Ամբաստանյալներից միայն Արթուր Վարդանյանն է գտնվում անազատության մեջ։ Նրա պաշտպան Սիրուշ Աղվանյանը Factor.am-ին ասաց, որ Վարդանյանն ունի առողջական խնդիրներ, բժիշկներն արգելել են նրան տեղաշարժվել, սակայն նա այսօրվա նիստին ցանկացել է մասնակցել․ «Ձեռքերն ու ոտքերը թույլ են, նա «Դատապարտյալների հիվանդանոց»-ում էր բուժում ստանում, բայց առողջական վիճակը լավանալու փոխարեն ավելի վատացավ։ Միջնորդություն ենք ներկայացրել և սպասում ենք, որ նա տեղափոխվի քաղաքացիական հիվանդանոց իր նախընտրած բժշկի մոտ բուժվելու»։
Նշենք, որ ՄԻՊ-ը ևս վերջերս արձանագրել էր, որ Արթուր Վարդանյանին անհրաժեշտ է տեղափոխել քաղաքացիական հիվանդանոց։
Հիշեցնենք, որ 2015-ի նոյեմբերի 25-ին ԱԱԾ-ն հայտարարություն տարածեց այն մասին, որ Նորք-Մարաշում վնասազերծվել է զինված խումբ: Ըստ մեղադրանքի՝ Արթուր Վարդանյանի գլխավորած՝ 2015 թվականին Նորք-Մարաշում վնասազերծված 20 հոգանոց զինված խումբը ծրագրել է բռնությամբ զավթել իշխանությունը:
Լիլիթ Շաբոյան
