Ազգային ժողով հրավիրելու հերթը հասավ Կենտրոնական բանկին. հայտնի է օրակարգը

Factor.am-ի տեղեկություններով այսօր հանդիպում է տեղի ունենալու Կենտրոնական բանկի ներկայացուցիչների և ԱԺ «Իմ քայլը» խմբակցության որոշ պատգամավորների միջև: Հանդիպման ժամանակ քննարկվելու են գյուղատնտեսության ապահովագրության ներդրմանը վերաբերվող հարցեր:

Այս տեղեկությունը Factor.am-ի հետ զրույցում հասատեց նաև «Իմ քայլը» խմբակցության պատգամավոր, տնտեսագետ Արտակ Մանուկյանը: «Այս պահին իրենց հրավիրում ենք, որ իրենց տեսլականը նայենք, հասկանանք: Կենտրոնական բանկը գյուղատնտեսության ապահովագրության ներդրման հետ կապված քննարկումներ է իրականացնում, հրավիրում ենք, որպեսզի Ազգային ժողովն էլ անմասն չմնա, ծանոթանա առաջարկվող մոդելներին և իր առաջարկություններն անի: Մեկնարկել է գյուղատնտեսական սեզոնը և ենթադրելի է, որ պատգամավորներն էլ գյուղացիների հետ հանդիպումներ են ունենում, կհասկանան այդ մոդելի դրական ու բացասական կողմերը»,- ասաց Արտակ Մանուկյանը:

Երեկ մեզ հետ զրույցում «Իմ քայլը» խմբակցության ղեկավար Լիլիթ Մակունցը տեղեկացրել էր, որ հանդիպելու են նաև ոստիկանապետ Վալերի Օսիպյանի, ԿԳ նախարար Արայիկ Հարությունյանի և տրանսպորտի, կապի և ՏՏ նախարար Հակոբ Արշակյանի ու տարածքային կառավարման և զարգացման նախարար Սուրեն Պապիկյանի հետ: Ավելի վաղ էլ խմբակցությունը աշխատանքային փակ հանդիպումներ է ունեցել վարչապետ Նիկոլ Փաշինյանի, ֆինանսների նախարար Ատոմ Ջանջուղազյանի և ՊԵԿ նախագահ Դավիթ Անանյանի հետ։

Նարեկ Կիրակոսյան