Հարգելի կոռումպացված չինովնիկներ, թակարդ ենք դրել, կոչ ենք անում մինչև մայիսի 1-ը ակտիվ լինել. Նիկոլ Փաշինյան. ՏԵՍԱՆՅՈՒԹ

Կառավարության փետրվարի 21-ի նիստում ընդունվեց «Աջակողմյան ղեկային տեղաբաշխմամբ տրանսպորտային միջոցների ներմուծումն արգելելու մասին» Հայաստանի Հանրապետության օրենքում փոփոխություն կատարելու մասին որոշման նախագիծը:

Ըստ նախագծի՝ «Աջակողմյան ղեկային տեղաբաշխմամբ տրանսպորտային միջոցների ներմուծումն արգելելու մասին» Հայաստանի Հանրապետության 2018 թվականի մարտի 1-ի թիվ ՀՕ-125-Ն օրենքի 2-րդ հոդվածի «որոնք ձեռք բերելու համար վճարումները կատարվել են մինչև 2018 թվականի հունվարի 25-ը» բառերը փոխարինել «որոնք ՀՀ տարածք ներմուծողների կողմից մաքսային մարմիններ ներկայացվող փաստաթղթերում առկա տեղեկատվության համաձայն ձեռք են բերվել մինչև 2018 թվականի դեկտեմբերի 30-ը և ՀՀ տարածք են ներմուծվելու մինչև 2019 թվականի ապրիլի 1-ը» բառերով:

Նախագծով՝ աջ ղեկ ունեցող մեքենաներ հնարավոր կլինի Հայաստան ներմուծել մինչև ապրիլի 1-ը՝ պայմանով, որ դրանք ձեռք են բերվել մինչև 2018 թ. դեկտեմբերի 30-ը։

Վարչապետ Նիկոլ Փաշինյանը նշեց, որ քանի որ արդեն իսկ կան կուտակված շատ մեքենաներ, առաջարկում է Հայաստան ներմուծման ժամկետը երկարաձգել մինչև մայիսի 1-ը։

Փոխվարչապետ Մհերի Գրիգորյանը նկատեց, որ որոշման նախագիծը կարող է կոռուպցիոն ռիսկեր առաջացնել՝ սահմանված գնման ամսաթվի հետ կապված, որը կարող է ճշգրիտ չներկայացվել՝ առաջարկելով օրենքում համապատասխան եզրույթը հանել։ Փոխվարչապետի այս դիտարկման հետ համաձայնվեց նաև ՊԵԿ ղեկավար Դավիթ Անանյանը՝ շեշտելով, որ հատկապես կայքերից գնելու պարագայում կա հնարավորություն փաստաթղթերի ամսաթվերը փոխելու, ուստի առաջարկեց առանձնահատուկ հսկողություն իրականացնել այս հարցում, ինչին ի պատասխան վարչապետ Նիկոլ Փաշինյանը նկատեց․ «Դե դա էլ լավ առիթ է հայտնաբերել կոռումպացված չինովնիկներին և ձերբակալել։ Համարենք սա խայծ, թակարդ, այնպես որ ուշադրություն, հարգելի կոռումպացված չինովնիկներ, թակարդ ենք դրել, կոչ ենք անում մինչև մայիսի 1-ը ակտիվ լինել»։

Մանրամասները՝ տեսանյութում։

Աղավնի Սուքիասյան