28.09.2026 | 15:20
Ալեն Սիմոնյանն ու Լիտվայի դեսպանը քննարկել են Հայաստան–ԵՄ հարաբերություններն ու տարածաշրջանային զարգացումները
Կառավարությունը մերժեց ԲՀԿ-ական պատգամավորների օրենսդրական նախաձեռնությունը. ՏԵՍԱՆՅՈՒԹ
Քաղաքականություն
21.02.2019 | 11:27
Ազգային ժողովի «Բարգավաճ Հայաստան» խմբակցության պատգամավորներ Գևորգ Պետրոսյանը, Նորա Առուստամյանը, Վարդան Ղուկասյանը, Արթուր Գրիգորյանը և Հրանտ Մադաթյանը գործադիրի հավանությանն են ներկայացրել օրենսդրական նախաձեռնություն, որով առաջարկվում է «Արհեստակցական միությունների մասին» ՀՀ օրենքում լրացումներ կատարել։
Ըստ նախագծի հեղինակների՝ գործող օրենքով արհեստակցական կազմակերպությունը հիմնադրվում է նրա հիմնադիրների (առնվազն 3 աշխատողի) նախաձեռնությամբ հրավիրված հիմնադիր ժողովի (համաժողովի, համագումարի) որոշմամբ և որպես կանոն, արհեստակցական միությունները ստեղծվում են տվյալ գործատուի մոտ աշխատող անձանց կողմից: Որպես արհմիության անդամ և նաև որպես գործատուի աշխատող, արհեստակցական միության ընտրովի պաշտոններում ընդգրկված անձինք կաշկանդված են լինում գործատուի հետ աշխատանքային հարաբերությունների փաստով:
Առաջարկվող փոփոխություններով նախատեսվում է սահմանել անկախ արհմիություն ստեղծելու և դրան անդամակցելու հնարավորություն, ինչը հասանելի կլինի տարբեր գործատուների մոտ աշխատող ամենատարբեր մասնագիտություններ ունեցողների համար:
Հարցի զեկուցող Աշխատանքի և սոցիալական հարցերի նախարար Զառա Բաթոյանը առաջարկվող փոփոխությունների վերաբերյալ նկատեց, որ պատգամավորներն առաջարկում են սահմանել, որ «արհեստակցական կազմակերպության մասնակիցներ կարող են լինել նաև տնտեսության տարբեր ճյուղերում միևնույն կամ տարբեր գործունեություն իրականացնող գործատուների հետ աշխատանքային պայմանագիր կնքած աշխատողները», սակայն նման դրույթ արդեն գործում է:
Նախագծի ընդունման պարագայում կստացվի, որ ոչ միայն համապատասխան ճյուղի տարբեր գործատուների հետ աշխատանքային պայմանագիր կնքած աշխատողները կկարողանան միավորվել և ստեղծել արհեստակցական կազմակերպություն, այլև տարբեր ճյուղերի տարբեր գործատուների հետ աշխատանքային պայմանագիր կնքած աշխատողները:
Մանրամասները՝ տեսանյութում։
Աղավնի Սուքիասյան
