18.01.2026 | 16:33
Մենք վստահ քայլերով շարժվում ենք միջազգային մեծ մրցաշարեր հյուրընկալելու ուղղությամբ․ ՀՖՖ նախագահի ուղերձը
Վարդինե Գրիգորյանը՝ 2018 թվականի «Խիզախ կին» մրցանակակիր. ՏԵՍԱՆՅՈՒԹ
Հասարակություն
20.02.2019 | 20:17
Այսօր Մատենադարանում տեղի ունեցած «Համընդհանուր իրավունքներ 2018» մրցանակաբաշխության ընթացքում «Խիզախ կին» անվանակարգում մրցանակին արժանացավ Վարդինե Գրիգորյանը՝ բոլոր քաղաքացիների հավասար իրավունքներն ու հավասար հնարավորություններն ընդլայնելու ուղղությամբ տարած տևական և համարձակ գործունեության համար:
«Խիզախ կին» մրցանակն արժևորում է այն կին առաջնորդին, որը մարտահրավեր է նետել գենդերային կարծրատիպերին՝ հավասար իրավունքների ջատագովության ու մենթորության միջոցով: Պարգևը ստանալուց հետո Վարդինեն անկեղծացավ. «Մրցանակի մասին իմանալու պահից մտածում եմ՝ ինչ պետք է ասեմ և, խուճապից բացի, ուրիշ բան չեմ զգում»: Վարդինե Գրիգորյանը շնորհակալություն հայտնեց մրցանակաբաշխությանը մասնակցող օտարերկրյա դեսպաններին՝ իրենց ելույթներում հանդուրժողականության, բազմազանության ու հավասարության մասին խոսելու համար:
«Իմ կարծիքով՝ սա ամենակարևոր մեսիջն է, որ պետք էր տալ Հայաստանում այս պահին: Ու շնորհակալ եմ նման հետևողականության համար: Հուսով եմ, որ դա և՛ ՀՀ քաղաքացիների, և՛ իրավապաշտպանների, և՛ Կառավարության համար հստակ ուղերձ է, որ պետք է կարևորվի յուրաքանչյուր քաղաքացին: Եվ մենք այդ ուղղությամբ որևէ ջանք չպետք է խնայենք, որպեսզի մարդիկ Հայաստանի Հանրապետությունում ապրեն արժանապատիվ, երջանիկ ու համախմբված»,- հավելեց մրցանակակիրը:
Նշենք, որ Համընդհանուր իրավունքների մրցանակաբաշխությունն առաջին անգամ Հայաստանում միջազգային համայնքի կողմից կազմակերպվել է 2012 թվականին՝ ի մեծարումն այն անհատների և կազմակերպությունների, որոնք իրենց ամենօրյա գործունեությամբ ձգտում են գերազանցության, մարդու իրավունքների խթանման, ներառականության և բարեփոխումների՝ այդ գործընթացում հաճախ անտեսելով սեփական շահն ու անգամ վտանգելով իրենց կյանքը։ 2018 թվականին Համընդհանուր իրավունքների մրցանակները տրամադրվեցին 9 անվանակարգերում։
Մանրամասները՝ տեսանյութում:
