«Ֆենտըզի», հատուկ ծառայությունների մասին գրքեր, Լևոն Խեչոյան, պատմիչներ․ ի՞նչ են կարդում Հայաստանի պաշտոնյաները

Արդեն մի քանի տարի է փետրվարի 19-ը ՝ Հովհաննես Թումանյանի ծննդյան օրը, Հայաստանում նշվում է որպես գիրք նվիրելու օր։ Factor.am-ը պարզեց, թե Հայաստանի նոր քաղաքական էլիտայի՝ տարբեր պաշտոններ զբաղեցնող անձինք, նախարարներն ու պատգամավորներն ի՞նչ գիրք կամ գրքեր են կարդում։

ԱԺ նախագահ Արարատ Միրզոյանն իր օգնականի միջոցով փոխանցեց, որ հիմա կարդում է «ֆենտըզի» ժանրի գրականություն։ Վերնագրեր, հեղինակներ Արարատ Միրզոյանը չէր հստակեցրել։

ՀՀ ոստիկանապետ Վալերի Օսիպյանը ներկայումս կարդում է Ի․ Բ․ Լինդեր, Ս․Ա․ Չուրկին համահեղինակությամբ՝ «Աշխարհի հատուկ ծառայությունները՝ 500 տարվա մեջ» գիրքը։

Հատուկ ծառայությունների մասին գիրք է կարդում նաև ՀՀ ԱԺ Պաշտպանության, ներքին գործերի և ազգային անվտանգության հանձնաժողովի նախագահ Անդրանիկ Քոչարյանը։ Այն է՝ Վիկտոր Սուվորովի ինքնակենսագրական ոճով գրված «Ակվարիում» վեպը։

«Իմ քայլը» դաշինքի պատգամավոր Հայկ Սարգսյանն ասաց․ «Կարդում եմ Նիկոլ Փաշինյանի «Երկրի հակառակ կողմը», խնդրում եմ չքաղաքականացնել»։

Բարձրագույն որակավորման հանձնաժողովի նախագահ Սմբատ Գոգյանն էլ մեզ հետ զրույցում ասաց․ «Կարդում եմ Ջեյմս Օլդրիդջի» «Որսորդը», նաև՝ Տարոն ԱճեմօղլԻ, մի հարյուր էջ էլ կարդացել եմ արդեն, անգլերենով վաղուց էի փորձել, լեզուս չհերիքեց, բայց որ հայերենը եղավ՝ կարդում եմ »։

Արտակարգ իրավիճակների նախարար Ֆելիքս Ցոլակյանն ասաց, որ կարդում է Լևոն Խեչոյանի «Հողի դողը» պատմվածքը։

Իսկ ՀՀ արդարադատության նախարար Արտակ Զեյնալյանը, լսելով հարցը, թե ինչ գիրք է կարդում, ասաց՝ «Հիմա՞, հիմա ես գիրք կարդալու ժամանակ չեմ ունենում»։

«Հայաստան » համահայկական հիմնադրամի գործադիր տնօրեն Հայկակ Արշամյանն էլ հայտնեց, որ հիմա կարդում է Ղևոնդ Ալիշանի «Հին հավատք» -ը և բանաստեղծ Հովիկ Հովեյանի «Անավարտ ցամաք» ժողովածուն։

ԱԺ ԲՀԿ-ական փոխխոսնակ Միքայել Մելքումյանը կարդում է բացառապես մասնագիտական՝ տնտեսագիտական գրականություն, գեղարվեստական գիրք կարդալու ժամանակ չունի։ «Կարդում եմ՝ «միկրոէկոնոմիկայի դասագիրք», մակրո եմ կարդում, Մենթյու․․․ թեպետ, որ ասում եմ՝ գեղարվեստական գրքի ժամանակ չունեմ, էդքան էլ էդպես չի, որովհետև կինս իսպաներենից թարգմանում է Պաոլո Կոելիո, նաև իր գրքաշարն եմ թերթում»,- մանրամասնեց Միքայել Մելքումյանը։

ԲՀԿ խմբակցության մեկ այլ պատգամավոր՝ Նաիրա Զոհրաբյանը, կարդում է ամերիկացի հեղինակ Մայքլ Վոլֆի «Կրակ և ցասում» գիրքը։ «Վոլֆը լրագրող է, որը ավելի քան 200 հարցազրույց է արել Թրամփի հետ աշխատող տարբեր մարդկանց հետ։ Գիրքը բավականին սատիրիկ է, ամերիկյան քաղաքականության խոհանոցն ու միջանձնային փոխհարաբերությունները բացահայտող հետաքրքիր դետալներով» ,- իր տպավորությունները ներկայացրեց Զոհրաբյանը։

«Լուսավոր Հայաստան» կուսակցության և ԱԺ նույնանուն խմբակցության նախագահ Էդմոն Մարուքյանն էլ հիմա կարդում է ամերիկյան հայտնի քաղաքագետ, փիլիսոփա ու գրող Ֆրենսիս Ֆուկույամայի «Անհատականություն» գիրքը։

Անի Սահակյան