Ազգային ժողովը խստացված հսկողության ռեժիմի է անցել: Առավոտյան պարզ է դարձել, որ այն անձինք, որոնք այցելուի կարգավիճակով գալիս են Ազգային ժողով, չեն կարող հեռախոսներով բարձրանալ Ազգային ժողովի վարչական շենք:
Դա նաև վերաբերում է այն լրագրողներին, որոնք հավատարմագրման համար դիմել են, բայց կառույցը դեռ չի տրամադրել հավատարմագրերը:
Անվտանգության աշխատակիցներն այցելուներին ասում են, որ վերևից հրահանգ կա, որ հեռախոսները պետք է հանձնեն անցակետում և նոր միայն բարձրանան վերև:
Նշենք, որ սա իսկապես «նորամուծություն» էր Ազգային ժողովում, քանի որ դեռ երեկ հնարավոր էր պատգամավորի կողմից տրված անցագրով բարձրանալ ԱԺ վարչական շենք՝ բջջային հեռախոսով: Բացի այս, մի քանի օր է, ինչ անվտանգության աշխատակիցները հատուկ սարքերի միջոցով ստուգում են ԱԺ-ից դուրս եկող անձանց պայուսակները: Նախկինում պայուսակները ստուգվում էին միայն ներս մտնելիս:
Factor.am-ն այս հարցի շուրջ պարզաբանում խնդրեց Ազգային ժողովի աշխատակազմի ղեկավար-գլխավոր քարտուղար Տիգրան Գալստյանից: Մեր հարցին, թե ինչով է պայմանավորված այս խստացված հսկողությունը, Գալստյանը պատասխանեց. «Ազգային ժողովում խստացված հսկողություն չէ, ԱԺ-ում կա սահմանված ռեժիմ և սա ռեժիմի սահմաններում է: Այսինքն, սա նոր ռեժիմ չէ, պարզապես ռեժիմի պահպանում է: Չգիտեմ՝ նախկինում պահպանում եղել է, թե՝ ոչ, ու ինչ չափով է եղել, հիմա ռեժիմի պահպանում է»:
Տիգրան Գալստյանը մեր հարցին ի պատասխան ասաց, որ հավատարմագրված լրագրողները կարող են համապատասխան տեխնիկայով և բջջային հեռախոսներով մուտք գործել խորհրդարանի շենք: «Չհավատարմագրվածների համար էլ պատգամավորները դիմում են ինձ, ես տալիս եմ թույլտվություն, որ տեխնիկական սարքերով ներս մտնեն: Նորից եմ կրկնում, սա մեր ռեժիմով միշտ է նախատեսված եղել: Չհավատարմագրված լրագրողի համար պատգամավորը դիմում է ինձ, և ես թույլ եմ տալիս սարքերով մտնել, այլապես նա համարվում է քաղաքացի ու չի կարող տեխնիկական սարքերով մտնել»,- եզրափակեց աշխատակազմի ղեկավարը:
Նարեկ Կիրակոսյան
