14.12.2025 | 19:26
Մրգի խանութի սեփականատերը զինաթափել է Սիդնեյի լողափին մարդկանց վրա կրակողներից մեկին
Լապշինի դեմ Ադրբեջանում նոր քրգործեր են հարուցվել
Հասարակություն
18.02.2019 | 19:55
«Ինձ մեղադրում են ահաբեկչության մեջ կամ ինչպես է Ադրբեջանը բոլորին բարկացրել» վերնագրով ֆեյսբուքի իր էջում գրառում է կատարել հայտնի բլոգեր, Իսրայելի քաղաքացի Ալեքսանդր Լապշինը:
«Մոտ մեկ ամիս առաջ ինձ զգուշացրել էին ռուսական «լուրջ» կազմակերպության ներկայացուցիչները, որ Բաքուն իմ դեմ նոր քրգործեր է հարուցել, իսկ այժմ՝ արդեն պաշտոնապես Իսրայելի ԱԳՆ-ն հաղորդեց: Ադրբեջանի իշխանություններին սաստիկ զայրացրել է այն հանգամանքը, որ ՄԻԵԴ-ն ընդունել է Բաքվում իմ դեմ մահափորձի վերաբերյալ բողոքը՝ ՌԴ-ից և Իսրայելից բժշկական եզրակացությունների հիման վրա:Ես իբր 2 հոդված եմ «խախտել»՝ «ահաբեկչության բացահայտ կոչեր» (ադրբեջանցի բլոգեր Մեհման Հուսեյնովին ազատ արձակելու կոչերի համար, որին ապօրինաբար բանտում են պահում) և Ադրբեջանի դեմ «բացահայատ կոչեր» (այնտեղ իմ հոդվածների երկար ցանկն է, որտեղ ես դատապարտում եմ Բաքվի իշխանություններին կոռուպցիայի և ապօրինությունների համար): Մոտ օրերս կարող է էլի ինչ-որ հոդվածներ հորինեն»,- ասվում է գրառման մեջ:
Լապշինը հայտնել է նաև, որ մարտին կլինի Լիոնում, Ինտերպոլի կենտրոնակայանում, որտեղ խոսակցություն է լինելու Ադրբեջանի կողմից այլախոհների և ազատ մամուլի դեմ այդ կազմակերպության գործիքակազմի ապօրինի օգտագործման մասին:
Ալեքսանդր Լապշինը ձերբակալվել էր 2016 թվականին Բելառուսում՝ Ադրբեջանի հարցման համաձայն: Պաշտոնական Բաքուն բլոգերին «սև ցուցակի» մեջ էր ներառել առանց իրենց հետ համաձայնեցնելու Լեռնային Ղարաբաղի Հանրապետություն այցելելու պատճառով: Բելառուսի Գերագույն դատարանը 2017 թվականի փետրվարի 7-ին մերժել էր Լապշինի բողոքը՝ կապված Բելառուսի Գլխավոր դատախազության որոշման հետ, որով Լապշինը պետք է արտահանձնվեր Ադրբեջան:
Լապշինը նույն օրը հատուկ չվերթով տեղափոխվել էր Մինսկից Բաքու` պետական անվտանգության ծառայության աշխատակիցների ուղեկցությամբ: Ծանր հանցագործությունները քննող Բաքվի դատարանում հուլիսի 20-ին հրապարակվել էր ՌԴ և Իսրայելի քաղաքացի բլոգերի գործով դատավճիռ. նա դատապարտվել էր 3 տարվա ազատազրկման: 2017 թվականի սեպտեմբերի 11-ին Իլհամ Ալիևը Լապշինին ներում է շնորհել:
