16.11.2024 | 20:02
Ֆրանսիայի ռեստորաններից մեկում պատանդ վերցված 4 աշխատակիցներն ազատ են արձակվել
Կիսանախագահական համակարգը ճանապարհ է հարթում մեկ անձի իշխանության ֆետիշացման համար․ Շարմազանով
18.02.2019 | 19:07
Կիսանախագահական համակարգը հետընթաց է լինելու: Արձագանքելով Հայ ազգային կոնգրես կուսակցության տարածած հայտարարությանը՝ Factor.am-ի հետ զրույցում ասաց Հանրապետական կուսակցության խոսնակ, ԱԺ նախկին փոխնախագահ Էդուարդ Շարմազանովը: Կոնգրեսը, հիշեցնենք, հայտարարություն է տարածել՝ գործող իշխանությանն առաջարկելով մեկ տարվա ընթացքում անցկացնել սահմանադրական հանրաքվե և անցում կատարել կիսանախագահական համակարգի, ապա անցկացնել նախագահական ընտրություններ: «Սա ակնհայտ հետընթաց կլինի թե՛ ժողովրդավարության զարգացման, թե՛ ազգային անվտանգության ամրապնդման և թե՛ պառլամենտարիզմի և քաղաքական բազմակարծության ապահովման տեսակետից»,- ասաց Շարմազանովը՝ նկատելով, որ կիսանախագահական համակարգը ճանապարհ է հարթում մեկ անձի իշխանության ֆետիշացման համար:
Ըստ Շարմազանովի՝ քաղաքականությունից հասկացող մարդիկ շատ լավ պատկերացնում են, որ առաջին նախագահն ու նրա քաղաքական թիմը պատահական հայտարարություններ չեն անում: «Ինչպես 2017 թվականին գնացին ընտրությունների խաղաղություն քարոզելով՝ մենք տեսանք, որ տարիուկես հետո նոր իշխանությունը կրկին օրակարգ բերեց խաղաղության օրակարգը: Բացի այդ, հայտնի է, որ Տեր-Պետրոսյանն ու նրա քաղաքական թիմը ոչ միայն Նիկոլ Փաշինյանի սատարողներն են, որովհետև մենք տեսնում ենք՝ առանցքային պաշտոններում նշանակվում են Տեր-Պետրոսյանի աջ եւ ձախ կողմերում կանգնած մարդիկ, այլ նաև ինքը՝ Տեր-Պետրոսյանը, եղել է Նիկոլ Փաշինյանի քաղաքական կնքահայրը: Սա պատահական հայտարարություն չէր, կոպիտ ասած, «բուլդոզերի» գործն իր վրա վերցրել է Տեր-Պետրոսյանի քաղաքական թիմը, որպեսզի ինֆորմացիան գցի, դժվար ճանապարհը հարթի, իսկ դրանից հետո հաշվի առնելով այն հանգամանքը, որ դեռևս էյֆորիան ամբողջությամբ չի անցել, մեկ տարվվա ընթացքում անեն հանրաքվե, ապա ափալ-թափալ նախագահական ընտրություններ, և հասնեն նրան, որ քաղաքական մենաշնորհը մեկ անհատի ձեռքում լինի»,- շարունակեց Շարմազանովը:
ՀՀԿ խոսնակը նաև հիշեցրեց՝ ինքը բազմիցս հայտարարել է, որ Հայաստանում հեղափոխություն տեղի չի ունեցել, տեղի է ունեցել իշխանափոխություն կամ հեղաշրջում, որի արդյունք, ըստ մեր զրուցակցի, հետևյալն է. «1998 թվականին Վազգեն Սարգսյանի գլխավորած եռյակը՝ Սերժ Սարգսյան, Ռոբերտ Քոչարյան, Ղարաբաղյան հարցում ունեցել է ՏերՊետրոսյանի ու նրա քաղաքական թիմի մոտեցումներից տարբերվող մոտեցում, 20 տարի անց ռևանշ է տեղի ունեցել, եկել են Տեր-Պետրոսյանի համախոհները և այս ամբողջ հեղաշրջման նպատակը Ղարաբաղյան հարցում տեր-պետրոսյանական լուծման գալն է»:
