10.08.2026 | 15:28
Արթուր Ղարիբյան. «Ինչը կարող է ավելի լավ լինել, քան «Զենիթին» հաղթելը»
Ավետիք Իսահակյանի անվան գրադարանն ընդլայնման կարիք ունի. Երևանի փոխքաղաքապետ
15.02.2019 | 22:14
Երևանի փոխքաղաքապետ Տիգրան Վիրաբյանն ու Երևանի գլխավոր ճարտարապետ Արթուր Մեսչյանն այսօր այցելել են Ավետիք Իսահակյանի անվան գրադարան ու ծանոթացել առաջարկվող տարբերակներին և դրանք քննարկել տեղում: Այս մասին հայտնում են քաղաքապետարանի աշխատակազմի տեղեկատվության և հասարակայնության հետ կապերի բաժնից:
Ավետիք Իսահակյանի անվան կենտրոնական գրադարանն ամեն օր մինչև 1500 այցելուի է սպասարկում: Նրանց մի մասը նախընտրում է ընթերցել և աշխատել հենց տեղում՝ ընդամենը 50 քմ տարածքով ընթերցասրահում:
Գրադարանի տարածքային խնդրին Երևանի քաղաքապետարանը քաջատեղյակ է: Այժմ քննարկվում են հնարավոր լուծումները: «Սա ընդլայնման հնարավորության առաջարկ է: Հիմնականում բաղկացած է լինելու երկու ընթերցասրահներից: Սրանք մի քիչ, այսպես ասած, ազատ կերպարի ընթերցասրահներ են: Ունենք նաև հարթակներ քննարկումների համար»,-ներկայացրել է ճարտարապետ Էրիկ Հովհաննիսյանը:
«Ընդհանուր տարածքը, որն ունի գրադարանն իր ենթակայության ներքո, քիչ է: Մենք գլխավոր ճարտարապետի և գրադարանի տնօրինության հետ քննարկում ենք, որպեսզի կարողանանք գտնել տարածքային համալրումների համար տարբերակներ: Գրադարանը գտնվում է քաղաքի սրտում, և ցանկացած ճարտարապետական միջամտություն կարող է որոշակի խնդիրներ առաջացնել: Ուստի, դրանք պետք է լինեն ընդունելի բոլորի համար» ,- ընդգծել է Տիգրան Վիրաբյանը:
Գրադարանին անհրաժեշտ են նոր ու բոլորի, այդ թվում՝ հաշմանդամություն ունեցող անձանց համար հարմարավետ պայմաններով ընթերցասրահներ: Թե ո՞ր հատվածից և ինչպե՞ս կընդլայնվի գրադարանի տարածքը, մասնագետները կորոշեն առաջիկայում:
«Ուզում եմ հույս հայտնել, որ անպայման կգտնվի որևէ լուծում, և Երևանի ընթերցողները սպասում են այդ լուծմանը» ,-նշում է Հասմիկ Կարապետյանը:
Գրադարանի տարածքի ընդլայնման գաղափարը կյանքի կոչելու գործին մասնակցելու ցանկություն է հայտնել նաև Հայաստանում ԱՄՆ դեսպանատունը:
«Գիտեք, որ այսօր գրադարանում գործում է «Ամերիկյան անկյուն»: Իրենք պատրաստակամ են նաև տեխնիկական վերազինումն իրականացնել, ինչը ևս շատ կարևոր է»,- նշել է Տիգրան Վիրաբյանը:
Իսահակյանի անվան կենտրոնական գրադարանից մեկնարկող բարեփոխումների համընդհանուր ծրագիրը կշարունակվի Երևանի համայնքային մյուս գրադարաններում:
«Մենք փորձելու ենք համայնքային ենթակայությամբ գործող բոլոր գրադարանները բերել այսպիսի բարձր պրոֆեսիոնալ մակարդակի: Ցավում եմ, որ որոշ գրադարաններում ունենք ընթերցողի պակաս, և այստեղ կառավարման աշխատանք պետք է տանենք, որ գրադարանները լինեն հետաքրքիր ընթերցողի համար»,- ընդգծել է Երևանի քաղաքապետի տեղակալը:
Երևանի քաղաքապետարանն առաջիկա տարիներին կշարունակի գրադարաններում ժամանակակից տեխնոլոգիաների կիրառման և ընթերցողներին գրադարան բերելու նախաձեռնությունները:
