Սերժ Սարգսյանը գուցե արժեզրկի ընդդիմության հնարավոր պայքարը. Ստյոպա Սաֆարյան

Միջազգային և անվտանգության հարցերի հայկական ինստիտուտի նախագահ, քաղաքագետ Ստյոպա Սաֆարյանը հայտարարում է, որ ընդդիմադիր դաշտի միավորումն ու 2018 թվականին ընդառաջ նախագահ Սերժ Սարգսյանի հնարավոր վերարտադրության դեմ պայքարը իրեն հիշեցնում է խորհրդարանական ընտրությունները, երբ քաղաքական ուժերը դրան սկսեցին պատրաստվել ոչ թե նախորդ ընտրություններից անմիջապես հետո, այլև հերթական խորհրդարանական ընտրությունների նախաշեմին:

«Միմյանց հետ խորհրդակցություններ սկսեցին և այլն, իսկ թե ինչով ավարտվեց այդ ամենը, մենք բոլորս տեսանք. հապճեպ կայացրած որոշումներ, անհասկանալի դաշինքներ, որոնց իմաստը և առաքելությունը այդպես էլ չկարողացան բացատրել, խոսքը տվյալ դեպքում վերաբերում է ՕՐՕ դաշինքին և ընդհանրապես մյուս քաղաքական միավորներին նույնպես»,- Factor.am-ի հետ զրույցում ասաց քաղաքագետը:

Ըստ նրա՝ Սերժ Սարգսյանի և Հանրապետական կուսակցության հնարավոր վերարտադրության դեմ պայքարի հարցում ընդդիմությունը բավական ուշացել է, և այդ խնդրի լուծմանը քաղաքական ուժերը պետք է շատ ավելի վաղ նախապատրաստվեին:

Հիշեցնենք՝ օրերս «Ժառանգություն» կուսակցության վարչության անդամ Սուսաննա Մուրադյանը հայատարարեց, որ կուսակցության նախագահ Րաֆֆի Հովհաննիսյանը և կուսակցության փոխնախագահ Արմեն Մարտիրոսյանը ընդդիմության միավորման շուրջ բանակցություններ են սկսել՝ առանց մանրամասնելու, սակայն, որ ուժերի հետ են հանդիպումներ ունեցել:

Շողիկ Գալստյան