02.07.2026 | 16:32
ՔԿ-ն մանրամասներ է հայտնում գնդապետ Էդիկ Մալոյանի ձերբակալությունից
Չունենք վիճակագրություն, թե որ ժամին են ռադիո լսում խաղամոլները. «Ռադիո Վան»-ի ղեկավար
Հասարակություն
15.02.2019 | 17:03
Ազգային ժողովում տեղի է ունեցել «Իմ քայլը» խմբակցության պատգամավոր Հրաչյա Հակոբյանի և ռադիոկայանների ներկայացուցիչների հանդիպումը: Օրակարգում «Գովազդի մասին» ՀՀ օրենքում փոփոխություններ կատարելու մասին օրենքի նախագիծն էր:
Հիշեցնենք, որ Հրաչյա Հակոբյանն առաջարկում է փոփոխություններ, որով ցերեկային ժամերին կարգելվի հեռուստառադիոընկերություններով եւ առցանց լրատվամիջոցներում շահումով խաղերի գովազդների հեռարձակումը:
«Ռադիո Վան»-ի ղեկավար Շուշանիկ Արևշատյանը հանդիպումից հետո ասաց, որ եթե այս օրենքն ընդունվի, ապա լրատվամիջոցները ֆինանսական մեծ կորուստներ կկրեն: Ռադիոընկերությունների ներկայացուցիչները հստակ ներկայացրել են իրենց առաջարկները, բայց այդ մասին չխոսեցին, քանի որ, ըստ նրանց, դրանք քննարկման փուլում են:
«Ինձ թվում է, որ մենք բոլորս ճիշտ ուղու վրա ենք: Լրատվամիջոցները մեծ վնաս կկրեն, եթե օրենքն ընդունվի սխալ ձևով»,- ասաց Շուշանիկ Արևշատյանը:
Factor.am-ի դիտարկմանը, որ օրենքի նախագծի հեղինակ Հրաչյա Հակոբյանն ասում է, որ եթե գովազդները ցերեկային ժամերից տեղափոխվեն գիշերային ժամեր, այդպիսով եկամուտները կպահպանվեն, Արևշատյանն արձագանքեց. «Մենք չունենք վիճակագրություն, թե ո՞ր ժամին են ռադիո լսում խաղամոլները: Մասնագիտացված աղբյուրներ պետք է լինեն, որ մենք կարողանանք դրա մասին խոսել: Այդ խոսակցութուններն անիմաստ են, քանի դեռ այդ տվյալները չունենք: Ես հուսով եմ, որ մենք այսօր ելք գտանք, թե ինչպես այդ կորուստներից խուսափենք, բայց հիմա չեմ կարող դրանց մասին խոսել»:
Պատգամավոր Հրաչյա Հակոբյանը նույնպես չցանկացավ քննարկման մանրամասները ներկայացնել: Միայն ասաց, որ ռադիոընկերությունների մասով փոփոխություններ են լինելու նախագծում, որոնց մասին կտեղեկացնեն առաջիկայում:
Մանրամասները՝ տեսանյութում:
