15.01.2025 | 23:34
Իսրայելն ու ՀԱՄԱՍ-ը հրադադարի համաձայնագիր են ստորագրել
Բացառիկ դեպքերում որոշ քաղաքացիներ կկարողանան ազատվել պարտադիր զինծառայությունից. Կառավարությունը սահմանեց կարգը
Քաղաքականություն
15.02.2019 | 12:53
Մի շարք բնագավառներում նշանակալի ներդրում ունեցած անձինք կկարողանան ազատվել պարտադիր զինվորական ծառայությունից: Որոշումն ընդունվեց ՀՀ Կառավարության փետրվարի 15-ի նիստում: Չզեկուցվող հարցերի շարքում ներառված որոշման նախագծի համաձայն՝ այս արտոնությունից կօգտվեն կրթության, գիտության, մշակույթի, արվեստի և սպորտի բնագավառում նշանակալի ներդրում ունեցած անձինք:
Կարգի կիրառման իմաստով բացառիկ դեպքեր են համարվում. – քաղաքացուն մշակույթի և արվեստի բնագավառներում գործունեության համար ՀՀ Կառավարության կողմից նախկինում տարկետում տրված լինելու և այդ բնագավառներում քաղաքացու կողմից Հայաստանի Հանրապետության կառավարության 2018 թվականի ապրիլի 12-ի N 457-Ն որոշման համաձայն նշանակալի նվաճումներ ունենալու հանգամանքները;
– քաղաքացուն սպորտի բնագավառում գործունեության համար ՀՀ Կառավարության կողմից նախկինում տարկետում տրված լինելու և այդ բնագավառում քաղաքացու կողմից Հայաստանի Հանրապետության կառավարության 2018 թվականի ապրիլի 12-ի N 450-Ն որոշման համաձայն նշանակալի նվաճումներ ունենալու հանգամանքները;
– գիտական աստիճան ունեցող քաղաքացուն կրթության և գիտության բնագավառներում գործունեության համար ՀՀ Կառավարության կողմից նախկինում տարկետում տրված լինելու և քաղաքացու կողմից Հայաստանի Հանրապետությունում օրենքով սահմանված գիտական և գիտատեխնիկական գործունեությամբ զբաղվելու հանգամանքները:
«Քաղաքացին պարտադիր զինվորական ծառայությունից ազատվում է Կառավարության որոշմամբ՝ կրթության և գիտության, մշակույթի, սպորտի և երիտասարդության հարցերի բնագավառներում (այսուհետ՝ համապատասխան բնագավառներ) պետական լիազոր մարմնի ներկայացմամբ: Պարտադիր զինվորական ծառայության ենթակա քաղաքացուն պարտադիր զինվորական ծառայությունից ազատելու հարցը քննարկվում է հայտարարված զորակոչի ընթացքում»,- ասված է նախագծում: Նշենք, որ պարտադիր զինվորական ծառայությունից քաղաքացին ազատվում է իր դիմումի կամ գիտության, կրթության, մշակույթի, արվեստի, սպորտի բնագավառների հեղինակավոր մասնագետների, պետական, քաղաքական և հասարակական գործիչների անհատական կամ կոլեկտիվ միջնորդությունների հիման վրա:
