Մարդու իրավունքների խախտումներին հեղափոխական Կառավարությունը պետք է ավելի ուժեղ արձագանքեր. ՏԵՍԱՆՅՈՒԹ

Կառավարության ծրագրում անհամաչափության գնահատական կարելի է տալ և՛ դատաիրավական ոլորտի, և՛ իրավունքների բաժնի վերաբերյալ, որովհետև ակնկալիք կար, որ հեղափոխական Կառավարությունը պետք է խիստ ընդգծված ձևով հռչակեր մարդու իրավունքների նկատմամբ հարգանքի և պաշտպանության կարևորությունը։

«Ինչպե՞ս ապահովել դատարանների անկախությունը և մարդու իրավունքների արդյունավետ պաշտպանությունը» թեմայով քննարկման ժամանակ, անդրադառնալով Կառավարության ծրագրում մարդու իրավունքների վերաբերյալ բաժնին, ասաց «Իրավունքների պաշտպանություն առանց սահմանների» ՀԿ նախագահ Հայկուհի Հարությունյանը։

«Պետք է հստակ արձանագրվեր, որ այսուհետ մարդու իրավունքների խախտումները բացառվելու են։ Հետհեղափոխական, զարգացման միտում ունեցող Կառավարությունը, կարծում եմ, պետք է նման արձագանք ունենար, սակայն դրանք ավելի թույլ են»,- նկատեց Հարությունյանը։

Քննարկմանը ներկա արդարադատության նախարարի տեղակալ Սուրեն Քրմոյանը չհամաձայնեց հնչեցված տեսակետի հետ՝ շեշտելով, որ կարևոր է այն հիմքը, որը դրվել է այդ ծրագրում։ «Կարևորն այն է, որ դրված է առանցքային ուղղությունը և շեշտված՝ օրենքի առաջ բոլորը հավասար են լինելու, արդարության բացակայությունն ու դրանից բխող թիրախներն էլ պետք է ձևակերպվեն, իսկ եթե գտնում եք, որ ձևակերպումներն ավելի ուժեղ պետք է լինեին, կարծում եմ, որ կա այն հիմքը, որի հիման վրա կարելի է մարդու իրավունքների պաշտպանությունից բխող քայլեր իրականացնել»։

Մանրամասները՝ տեսանյութում։