02.07.2026 | 20:24
ՔՊ խմբակցության ղեկավարի թեկնածու է ընտրվել Արուսյակ Մանավազյանը. Նիկոլ Փաշինյան. ՏԵՍԱՆՅՈՒԹ
Չեմ կարծում, որ ԱՄՆ Պետդեպի հայտարարությունը չափազանց սուր էր. Ռուբեն Ռուբինյան. ՏԵՍԱՆՅՈՒԹ
Քաղաքականություն
14.02.2019 | 14:33
Ես չեմ կարծում, որ ԱՄՆ պետդեպարտամենտի հայտարարությունը չափազանց սուր էր: Այս մասին ԱԺ-ում լրագրողների հետ զրույցում ասաց արտաքին հարաբերությունների մշտական հանձնաժողովի նախագահ Ռուբեն Ռուբինյանը՝ անդրադառնալով ԱՄՆ պետքարտուղարության հայտարարությանը, որ չի պաշտպանում Հայաստանից Սիրիա մասնագետների ուղարկելու քայլը:
«Ես կարծում եմ, որ մեր ամերիկացի գործընկերները հասկանում են մեր դրդապատճառների տրամաբանությունը: Սիրիա մասնագետների խումբ ուղարկելը մեզ համար շատ կարևոր էր, սա առաջին հերթին ուղղված էր այնտեղ ապրող մեր հայրենակիցների անվտանգությունն ապահովելուն»,- ասաց նա:
Ռուբինյանը չի կարծում, որ Սիրիա մասնագետների խումբ ուղարկելը և պետքարտուղարության հայտարարությունը կարող է խնդիրներ առաջացնել հայ-ամերիկյան հարաբերություններում: Նշենք, որ ԱՄՆ պետքարտուղարությունն արձագանքել է Հայաստանից Սիրիա մասնագետների 83 հոգանոց խումբ գործուղելուն և ընդգծել, որ չի պաշտպանում Հայաստանի և Ռուսաստանի միջև համագործակցությունն այս առաքելության նպատակով:
«Մեզ հասկանալի է Սիրիայի մարդասիրական իրավիճակին արձագանքելու այլ պետությունների ցանկությունը, և մենք կիսում ենք Մերձավոր Արևելքում կրոնական փոքրամասնությունների պաշտպանության շուրջ մտահոգությունները: Այնուհանդերձ, մենք չենք պաշտպանում Սիրիայի զինված ուժերի հետ ներգրավվածությունը՝ լինի քաղաքացիական անձանց օգնություն ցուցաբերելու նպատակով, թե ռազմական ուղղվածության: Մենք նաև չենք պաշտպանում Հայաստանի և Ռուսաստանի միջև համագործակցությունն այս առաքելության նպատակով»,- ասված է պետքարտուղարության՝ լրատվամիջոցների հարցումներին տրված պատասխանում, որը տրամադրել են Հայաստանում ԱՄՆ դեսպանատնից:
Մանրամասները՝ տեսանյութում:
