Լևոն Տեր-Պետրոսյանն էր մեղավոր, երբ ես երեխա էի և աղքատ էինք, բա ո՞նց ստացվեց՝ հիմա պետության ղեկավարն աղքատության համար մեղավոր չէ ու այն մեր գլխում է․ ՏԵՍԱՆՅՈՒԹ

Ազգային ժողովի «Լուսավոր Հայաստան» խմբակցության ղեկավար Էդմոն Մարուքյանը զարմանում է՝ թեև իրենք արդեն երեք օր է՝ հանգիստ տեղները նստած հետևում են, թե ինչպես է ԱԺ-ում ընթանում Կառավարության ծրագրի քննարկումը, բայց ակնհայտ է, որ այն ընթանում է անհանդուրժողականության մթնոլորտում։

Պատգամավորը զարմանում է՝ ինչպես է ստացվում, որ կարճ ժամանակ առաջ ընդդիմադիր ուժը դառնալով իշխանություն այդքան արագ անհանդուրժող է դառնում ընդդիմության նկատմամբ և ձեռ առնում ընդդիմությանը։ «Կարծում եմ՝ շատ լավ խոսք կա Աստվածաշնչի մեջ․ ասվում է՝ գայթակղություն լինելու է, բայց վայ նրան, ում միջոցով կլինի։ Բնականաբար, գայթակղություն կար անցնել չափն ու սահմանները և կային անցնողներ, իսկ մեր գործընկերները մեզ լավ ճանաչելով գիտեն՝ չի լինում նման դեպքերում այնպես, որ մենք չարձագանքենք»,-խորհրդարանում իր ելույթի ժամանակ իր մտահոգությունները բարձրաձայնեց պատգամավորը։

Անդրադառնալով Կառավարության ղեկավար Նիկոլ Փաշինյանի այն դիտարկմանը, թե աղքատությունը մարդկանց գլխում է՝ Մարուքյանը մտովի ետ գնաց և հիշեց, թե նախկինում աղքատության մեղավորներն ովքեր էին։ «Մտովի ետ եմ գնում 90-ականներ և հիշում եմ՝ երբ ես երեխա էի, աղքատ էինք, ով էր մեղավոր և միակ և անկրկնելի մեղավորը Լևոն Տեր-Պետրոսյանն էր, 2000-ականներին, երբ մենք աղքատ էինք, դրա միակ և անկրկնելի մեղավորը Ռոբերտ Քոչարյանն էր: Հետո գալիս եմ մինչև 2018 թվական․ ո՞վ էր աղքատության միակ և անկրկնելի մեղավորը՝ Սերժ Սարգսյանը։ Մենք այդպես ենք սովորեցված, այդպիսին է մեր քաղաքական համակարգը և հիմա գալիս է հեղափոխության լիդեռն ու հայտարարում, որ աղքատությունը մարդկանց գլուխներում է, և դուք պետք է ձեր գլխից հանեք այդ աղքատությունը և տնտեսական հեղափոխություն կլինի։ Լավ, բա կառավարիչներն ինչի՞ համար են, բա ինչի՞ էին էն ժամանակ 3 առաջնորդները մեղավոր, որ մենք աղքատ էինք, իսկ 4-րդ առաջնորդն ասում է՝ ես մեղավոր չեմ լինելու»,- ասաց Մարուքյանը։

Մանրամասները՝ տեսանյութում։

Աղավնի Սուքիասյան